Ni Rey Anthony H. Chiu, PIA
Duha na usab ka kinabuhi sa Pinoy nga tua sa abroad ang nakalas sa COVID-19, Septembre 2, ug midugang sa kadaghanon nga 757 na ka tawo ang nakalasan sa kinabuhi segun sa taho sa Department of Foreign Affairs (DFA).
Sa laing bahin, namatikdan sa susama nga dlaw ang 10 ka kompirmado nga kaso sa COVID-19 nga natala sa America ug sa Middle East. Tulo ka taho sa nanga-ayo sa Middle East ug Europa niana usab nga adlawa.
Kini samtang gitutokan sa DFA ug sa iyang mga buhatan sa Foreign Services ug padayon silang nagseguro sa kaluwasan ug kaayuhan sa mga Pinoy nga tua pa sa gawas sa nasud sa panahon sa pandemya.
Ang duha ka bag-o lamang nakalas, maoy katapusang nadugang sa 757 na ka Pinoy nga makabsan sa kinabuhi sa pagpakigbugno sa COVID didto sa gawas sa nasud.
Alang sa mga Pinoy nga tua sa Middle East ug Africa, bisan hain man sa 27 ka nasud, may kinatibuk-an nga 6,975 ka kaso sa Covid, diin 476 na ka Pinoy nga tua didto ang namatay sa nahisgutang sakit.
Hinuon, sa dul-an sa 7 mil ka kaso, 4,164 niini ang nanga-ayo na samtang 2335 ka pasyente ang kasamtangan pa nga naa sa mga tambalanan.
Mga 178 usab ka kaso sa Pinoy nga nangamatay sa 454 ka kaso sa COVID didto sa rehiyon sa Amerika diin may 9 ka nasud.
May 166 lamang sa mga kaso sa Pinoy didto ang nagpadayon pang gipatambalan.
Dili managlayo ang kaso sa COVID sa mga Pinoy nga ania sa Asia Pacific Region ug sa Europa.
Sa Asia pacific Region, kinatibuk-an nga 1157 ka kaso sa COVID sa mga Pinoy ang natala, samtang sa Europa, 1166 Pinoy ang may kaso sa COVID.
Sa Asia Pacific Region, 799 na ang nanga-ayo samtang sa Europa, 760 ang nauli-an. 350 sa Asia Pacific Region ang nagpatambal pa samtang sa Europa, 311 lamang.
Hinuon, sa Europa, 95 ka kinabuhi sa mga Pinoy nga didto nasakit ang nakalas kon itandi sa walo lamang sa mga kaso sa Asia Pacific nga midayon ngadto sa kamatayon.
Segun pa sa DFA nga maoy naghiusa sa tanang mga taho sa kahimtang sa mga Pinoy sa gawas sa nasud, miabut na sa 10,096 ka Pinoy ang kompirmado nga natakdan na sa COVID, niini nga kadaghanon, 1978 pa lamang ang nakompirmar sa Department of Health International Health Relations.
Niini usab nga kadaghanon, 3,162 ang kasamtangan nga naa sa mga tambalanan, samtang 6,177 ang mga nasakit sa COVID, na-ospital ug karon gipagawas na sa mga tambalanan kay ma-ayo na.
Hinuon, walay kasayuran nga gipa-ambit ang DFA kon unsay sitwasyon sa mga nahibiling nga kompirmadong may COVID apan wala sa mga tambalanan.
Kini usab samtang miabut na sa 74 ka mga nasud ug rehiyon nga may Pinoy nga na-covid, segun sa DFA. (rahc/PIA7/Bohol)