Ni Elvira Bongosia, PIA
Hatagan na og kahigayonan ang mga gustong mosulod nga kawani sa Philippine National Police (PNP), Bureau of Fire Protection (BFP), Bureau of Jail Management and Penology (BJMP) ug Bureau of Corrections (BuCor) nga kulang sa gitas-on tungod kay gi-ubsan na ang minimum height requirement niini.
Kini human gi-aprobahan na sa ikatulo ug katapusang pagbasa ang Senate Bill No. 1563 o “PNP, BFP, BJMP and BuCor Height Equality Act”, nga magpa-ubos sa minimum height requirement sa usa ka kawani nga magserbisyo sa mga nahisgotang ahensiya.
Tungod niini, mahimo nang makasulod ug mahimong polis, bombero ug jail guards bisan gikulang sa height requirement kaniadto.
Sa lalaki, kinahanglan nga may gitas-on nga 1.57 metro o 5’2” ug alang sa babaye, may gitas-on nga 1.52 o 5’0” na lamang ang gitakdang minimum height.
Kaniadto, kinahanglang may gitas-on ang aplikante nga 5’4” kun lalaki ug 5’2” usab kun babaye.
Samtang ang mga indigenous peoples dili na kinahanglan niining rekisitos.
Kahinumdoman nga si Senador Ronald “Bato” dela Rosa nga kanhi Philippine National Police (PNP) chief ang nagduso sa maong balaodnon. (ecb/PIA7-Bohol)