Ni Elvira Bongosia
Gipa-amping sa Government Service Insurance System (GSIS) ang mga miyembro, pensyonado ug uban pa nilang kliyente batok sa mga nagpaka-aron-ingnon nga empleyado sa buhatan ug mangayo og personal nga impormasyon pinaagi sa Facebook Messenger.
Kini human makadawat ang GSIS og taho nga adunay nagpailang mga empleyado sa ilang buhatan nga nagpadala og private messages, gamit ang ilang personal Facebook accounts, aron kuhaon og contact information alang sa giingong updating sa GSIS records.
Sa advisory nga gipagawas sa GSIS, subling gipahinumdoman niini nga ang updating sa membership ug service records sa mga active members ipaagi sa Agency Authorized Officers (AAOs).
Ang updating usab sa mobile numbers mahimong himuon sa bisan asang GSIS Wireless Automated Processing System (GWAPS) kiosks.
Gipahinumdoman ang publiko nga mag-amping, magbinantayon ug manukit-sukit sa paghatag og bisan unsang impormasyon sa social media, ilabi na sa Facebook ug Messenger.
Gitambagan usab sa buhatan ang publiko nga likayan ang pagbutang og personal nga detalye sa public posts o comments section sa bisang asang Facebook pages aron dili makompromiso ang ilang records.
Dili usab angay basta nalang mohatag sa ilang personal information sa mga wala nailhing Facebook profile, account, group, o pages.
Gi-awhag usab ang tanang miyembro ug pensyonado sa GSIS sa pag-report dayon sa GSIS ug Facebook ang madawat nga kadudahang mga Facebook messages. (ecb/PIA7-Bohol)