Gituki ni Gob. Arthur Yap kauban ang school board ang mga hagit sa edukasyon ning panahon sa bag-ong kasarangan kon new normal.
Nahitabo ang pagtuki, atol sa usa ka virtual meeting sa mga sakop Provincial School Board (PSB) nga gipanguluhan sa gobernador niatong, Martes, Septembre 22, 2020.
Gituki sa maong tigom ang mga sistema ug pamaagi sa paghatud sa edukasyon ngadto sa mga tinun-an ug kabatan-onan taliwala sa pandemya.
Gipasalig ni Yap nga ang probinsiyal nga pangagamhanan, motabang gayud sa sektor sa edukasyon aron pagsiguro nga madawat sa mga tinun-an ang mga leksyon sa ilang panimalay samtang dili pa tugotan ang gitawag nga “face-to-face classes”.
Usa sa mga nag-unang pamaagi sa pagpadala sa mga leksyon mao ang ‘multi-media’ nga paagi sa pagklase gamit ang telebisyon, radyo, ug internet.
Kauban sa gobernador sa maong tigom sa school board ang mga kadagkuan sa Department of Education sa Bohol, pederasyon sa mga ginikanan nga gitawag ug Parents Teachers Association, ug ubang mga kadagkuan sa lalawigan.
Ang mga klase nga pampublikong tunghaan gitakdang buksan sa sunod
nga bulan sa Oktubre.