Duha ka kanhing mga rebelde nga taga lungsod sa Calape ug Loon ang mibalik sa sabakan sa gobyerno.
Nunot niini, nakadawat dayon sila og tabang panginabuhian pinaagi sa Enhanced Comprehensive Local Integration Program (ECLIP) sa nasudnong kagamhanan.
Ang gihisgutang duha ka mga kanhing rebelde mihimo sa ilang ‘oath of allegiance’ ngadto kang Gob. Arthur Yap didto sa munisipyo sa lungsod sa Calape niadtong Setyembre 29, 2020.
Human sa ilang pagpanumpa, si Yap mitunol kanila sa tseke nga nagkantidad og P65,000 matag usa diin ang P50,000 gitagana alang sa pagsugod ug panginabuhian samtang ang P15,000 gihatag isip ‘immediate assistance.’
Kining maong programa sa pangagamhan gilangkuban sa E-CLIP gipatuman sa: Department of National Defense, Department of the Interior and Local Government, Office of the Presidential Adviser on the Peace Process, Office of the President, ug sa National Housing Authority.
Ang mga kwalipikadong benepisyaryo niining programa mao ang mga regular nga miyembro sa National People’s Army (NPA) nga mitunga sukad sa Abril 3, 2018 hangtod sa unahan ug mipadayag sa tinguha sa pagbiya sa armadong kapintasan aron mamahimong mabungahon miyembro sa katilingban, apil na sa ilang mga sakop sa banay o tanang mga kanhing rebelde nga mitungha sugod Hulyo 1, 2016, lakip na usab sa mga gi-proseso na kaniadto apan wala makadawat sa kinatibuk-ang hinabang ubos sa Comprehensive Local Integration Program; ug mga miyembro sa Militia ng Bayan nga mitungha sugod Abril 3, 2018.
Kini sila makadawat gikan sa gobyerno niining mosunod: immediate assistance, re-integration assistance, ug firearms remuneration.
Ang mga benepisyo ug tabang naglakip usab sa: safety and security guarantees; immediate assistance nga P15,000; livelihood assistance nga P50,000; reintegration assistance nga P21,000; firearms remuneration nga nagkantidad sa dobleng balor sa itugyang pusil base sa Circular 2018-17 gi-petsahan Hulyo 5, 2018; PhilHealth enrolment; registration ngadto sa mga government entities.
Gawas pa niini, ang usa ka former rebel (FR) makapahimolos sa serbisyo sa halfway house samtang ang iyang enrolment ngadto sa ECLIP gi-proseso pa.
Ipaubos usab sila sa ‘healing and reconciliation initiatives’ nga maoy tinubdan sa psycho-social support ngadto sa mga FRs, ilang pamilya ug komunidad.
Ang bisan unsang dugang hinabang nga malangkob niini pinasikad sa Former Rebel Reintegration Plan (FRRP), kuhaon gikan sa mga partner institutions o ahensya ihatag usab kanila.
Mahimo kining mag-apil sa: capacity-building, skills training, probisyon sa tabang legal, pangempleyo, tabang medical, ug uban pa kun gikinahanglan. (PIA)