Adunay laraw karon ang kagamhanang probinsyal sa Bohol sa pagtukod sa mga ‘retail terminals’ alang sa mga isda aron matabangan nga adunay igo nga supply sa maong produkto. Niining paagiha, makasugakod ang pangagamhanan sa panginahanglan sa mga tawo alang sa supply sa isda ug nga dili kini magsalig sa panahon nga daghan ug isda..
Si Gob. Arthur Yap niadtong adlawng Martes, Setyembre 29, 2020, mihangyo sa Bureau of Fisheries and Aquatic Resources (BFAR) nga tabangan ang Bohol nga makaangkon ug mga himan sama sa seaweed powder facility, cold storage facilities, ice-making machines, and ice crushing machines with fish bins aron matuman kining gilaraw nga gitawag ug retail terminals.
Pinaagi sa usa ka sulat ngadto ni BFAR-7 regional director Allan Poquita, miingon si Yap nga bisan pa nga naningkamot pag-ayo ang mga anaa sa sektor sa agri-fisheries, aduna pa gihapoy mga kakulangan sa gi-ingong production chain sa industriya.
Miingon si Yap nga hangtud karon, wala pa makab-ot sa Bohol ang sitwasyon diin igo na ang supply sa isda na mapalit sa konsumidor nga Bol-anon.
Ang kagamhanang probinsyal nangandam na sa rehabilitasyon sa mga fishponds nga gamiton sa pagpadako ug mga isda sama sa bangus ug tilapia. Pagahimo-on kini pinaagi sa sa pagpalit ug mga kahimanan gamit ang financing sa bangko sa kantidad nga P54 million ug ang pagtukod sa usa ka fish feed mill nga mokabat sa kantidad sa P12 million.
Plano sa kagamhanang probinsyal nga motukod ug mga retail terminals sa mga napili nga mga dapit aron silbihan ang panginahanglan sa marketing sa mga tawo nga nagdumala sa production ug processing.
Giawhag usab sa gobernador ang suporta sa BFAR nga gastohan ang gilaraw nga usa ka seaweed powder faciiity aron mohimo ug ‘extender’ nga gamiton sa pagproseso sa mga karne ug uban pang produkto gikan sa isda diin ang mga salin mahimong ilawog sa mga mananap o dili ba kaha sa mga isda.
Matud pa ni Yap nga nagkinahanglan ang Bohol ug cold storage facilities aron magpabilin nga lab-as ang mga isda nga makuha sa mga dapit nga daghang isda susama sa Ubay, Mabini, Talibon, Getafe, ug Tubigon. Ipa-apil usab ni Yap ang pagpalit ug mga himan susama sa mga makina sa paghimo sa ice ug mga ice crushers nga adunay fish bins.
Aron makompleto ang gitawag nga value chain, gihangyo usab ni Yap ang BFAR sa pagtukod sa mga fish processing facilities alang sa bangus ug tilapia.
Ang pagtukod sa agri-fisheries retail terminals nagkinahanglan ug budget nga mokabat sa P35.986 million nga gastohan sa kagamhanang probinsyal uban sa pakig-alayon sa mga financial institutions ug mga lokal nga panga-gamhanan.
Ang kinatibuk-ang budget aron mapalit ang usa ka refrigerated storage alang sa mga isda mokabat kini ngadto P14.75 million. Gilaraw nga ang maong kantidad magagikan sa BFAR.