Ang pagpakig-alayon sa mga frontliners, komunidad, ug sa Inter Agency Task Force clusters sama sa security ug public safety alang sa pagpatuman sa Oplan Kalasag ni Dagohoy, maoy gitumbok sa sakop sa Philippine National Police (PNP) nga hinungdan sa pagpugong ug tukma nga pagkahon sa Corona virus disease (COVID) aron dili makakatag og daghan.
Kini pinsakid sa taho sa kapolisan pinaagi sa operations Officer sa Campo Dagohoy nga si Police Major Norman Nuez sa ngalan ni Police Senior Superintendent Joselito Clarito.
Gipasabot ni Nuez atol sa labing bag-o nga panagtigum sa online nga Provincial Peace and Order Council (PPOC) nga ang pagsagop sa lima ka konsepto sa pagpatuman sa Kalasag ni Dagohoy maoy mga dagko nga gikatampo sa kalampusan sa maong operasyon.
Kahinumduman nga ang Kalasag ni Dagohoy o ang taming ni Dagohoy gilangkoban sa pagpakatag sa mga tinugyanan uig kapolisan sa amihanang bahin sa kadagatan sa Bohol aron pugngan ang pagsulod-gawas sa katawhan, ilabi na sa mga isla, nga natumbok nga naduhig sa kagaw.
Gitaho ni Major Nuez nga ang gipalig-on nga SMART o Systematic, Maintained Analyzed subay sa tumong, Realistic ug sakto nga Timing sa pagpatuman sa balaod ug kampanya sa pagpasabut sa katawhan nga giabagan sa mga IATF sa mga kalungsuran nakapahimo nga malampuson ang mga lockdowns nga gipatuman.
Gibutyag usab ni Major Nuez nga ang Reinforced Border Security ug ang stratehiya sa pagkahon sa mga dapit nga adunay gikataho nga natakdan, dako ug nahimo kabahin niini.
Midugang si Nuez sa pagtaho nga kini, giabagan usab sa security ug kasaligan nga public safety strategy dungan sa pagpatuman sa modular lockdowns ug zoning containment strategy alang sa pagpugong sa pag gawas sa mga tawo.
Inubayan usab kini, matud pa ni Nuez, niining mosunod: tumbok nga paghimo sa mga contact tracing, paspas nga pagtesting sa mga gikatahapan nga natakdan sa virus, ug pag-isolate sa mga nag-positibo sa virus.
Kining tanan, matud pa ni Nuez, giduyogan usab sa pagkunhod sa mga kaso sa krimen ilabi na ang index crimes nga epekto na sa Oplan Kalasag ni Dagohoy ug sa estrikto nga pagpatuman sa mga checkpoints ug community quarantine protocols.
Gani, matud sa kapolisan, ang pagpahimutang sa Quarantine Control Points ug Checkpoints gikan sa lebel sa lalawigan, dakbayan, ug ngadto sa kalungsuran ug kabarangayan mahimo nga labing maayo nga bansay ug sanglitanan sa pagka epektibo sa “Whole-of-Community” approach sa pagtubag sa krimen ug krisis. ni Rey Anthony Chiu