Giplano karon sa Department of Labor and Employment (DOLE) ug sa Commission on Higher Education (CHED) nga manghatag ug cash assistance sa mga anak sa overseas Filipino workers (OFWs) nga nawad-an og trabaho o namatay tungod sa coronavirus disease (Covid) pandemic.
Matud pa sa taho, ang anak sa OFW nga anaa sa kolehiyo makadawat og P30,000 isip educational assistance.
Sa usa ka pahayag, miingon si DOLE Undersecretary Dominique Tutay nga ang nahisgotang one-time financial assistance nahisulod sa Tabang OFW Program sa DOLE ug CHED.
Matud pa sa dugang nga mga taho, adunay gigahin nga usa ka bilyon ka pesos (P1 bilyon) nga pondo ang gobyerno alang sa halos 30,000 ka benepisyaryong OFWs.
Ang taho nagaingon nga ang plano sa DOLE ug CHED mao ang pagsugod sa pagpanghatag sa educational assistance ning buwan sa Oktubre human makumpleto na ang listahan sa mga kwalipikadong anak sa mga OFW.
Dugang nga taho nagaingon nga adunay ipahigayong panagtigum aron susihon ug maayo ang himuong listahan sa mga benepisyaro aron makita kung mosibo usab kini sa listahan sa Overseas Workers Welfare Administration (OWWA).
Kinahanglan lang nga ipakita ang pagmatuod nga ang ilang mga anak naka-enroll o mag-enroll sa CHED-accredited o recognized colleges o university. (ECBongosia)