Sinulat ni Rey Anthony Chiu
Gipagawas sa Kapitolyo ang mga rekisitos ug mga gikinahanglan aron makabyahe ang usa ka Locally stranded individual (LSI), Overseas Filipino Worker (OFW) ug Authorized Persons Outsider Residence (APOR) alang sa mas dayag nga proseso.
Sa usa ka dokumento nga gipaambit ni Provincial Administrator manlalaban Kathyrin Fe Pioquinto sa awtoridad sa gobernador, gibutyag ngadto sa mga sakop sa Bohol Inter Agency Task Force (BIATF) Strategic Communications Cluster ang mga lagda nga pagasundon mao kining mosunod:
- Labing mahinungdanon gayud nga makigsabut una ang mobyahe ngadto sa LGU nga iyang padulgnan. Kini, matud pa, aron maseguro nga may ‘isolation’ o ‘quarantine facility’ siya nga kapadulngan, samtang masabutan ang mga pamaagi sa sundon nga mga ‘health’ ug ‘safety protocols’ samtang nagpa-ingon sa uli-an ug sa pag-abut niini hangtud mahuman ang kwarentina.
- Ikaduha, sa pagpakigsabut sa LGU, ang mopauli nga LSI, OFW o APOR kang kinsang mga dokumento sa pagbyahe napaambit na sa LGU Focal Person, ang focal person na ang moduso sa kompleto nga mga dokumento ngadto sa BIATF.
- Ang BIATF na ang magpahiluna sa schedule sa byahe sa mga mopauli nga LSI, ROF, ug APOR, ug ang BIATF na ang usab ang mopahibaw sa LGU, kabahin sa barko o eroplano nga pagasakyan sa pagpauli lakip na ang Philippine Coast Guard (PCG) sa naka iskedyul nga byahe.
- Sa pag-abut sa Bohol, ang LSI, ROF o APOR sugaton sa ilang mga tagsatagsa ka LGU gikan sa pantalan o tugpahanan, ug e-derecho kini sila ug hatud ngadto sa natumbok nga LGU quarantine facility.
Gidason usab sa dokumento nga gipagawas sa Kapitolyo ang General Travel Requirements alang sa LSI, ROF ug APOR.
Alang sa LSI, gikinahanglan siya nga magkuha og medical certificate gikan sa usa ka certified physician, makadala sa COVID Shield Travel Authority, ug may certificate of acceptance sa LGU nga iyahang abtan.
Alang sa mga ROF, gikinahanglang makapakita sila sa medical certificate usa ka certified physician, negatibo nga resulta sa COVID gikan sa usa ka accredited nga PCR Test laboratory, Travel Authority ug ang certificate of acceptance gikan sa abtan nga LGU.
Alang sa mga APOR, gikinahanglan nga siya adunay company Order o Memorandum for Work Purposes, Medical Certificate gikan sa certified physician, Certificate of Acceptance sa abtan nga LGU, Clearance gikan sa (BIATF), negatibo nga resulta sa Polymerase Chain Reaction (PCR) Test nga nakuha 48 hours sa dili pa mobyahe alang sa APOR nga dili na moabut og 5 ka adlaw nga ania sa Bohol ug mouli na dayon sa gigikanan nga lugar.
Sumala sa taho gikan sa Kapitolyo, dili mahimo ang LSI, ROF ug APOR nga mokalit lang ug abot sa pantalan o tugpahanan aron mouli nga wala maandam ang mga dokumento nga gikinahanglan aron makasakay. (PIA)