Duha ka managsuon ang nakabsan sa ilang kinabuhi human sila nakuryentehan didto sa lungsod sa Dimiao niadtong adlaw na Martes, Okt. 13, 2020 matud pa sa taho nga nahipos sa The Bohol Tribune gikan sa Kampo Dagohoy ning dakbayan sa Tagbilaran.
Ang mga biktima naila nga sila Tristan Dexter Hamlag, 26, taga barangay Limokon Ilaud, Dimiao ug ang iyang igsuon nga si Christian Val Hamlag, 20, ug nagpuyo sa susamang lugar, matud sa taho.
Sumala sa pasiunang imbestigasyon sa kapulisan, ang mga biktima mitaod ug antenna alang sa ilang himan na wifi gamit ang usa ka puthaw nga tubo.
Gitauran nila ug antenna ang ilang himan aron makakuha sila ug maayo nga reception sa signal ug makagamit sila ug paspas nga internet.
Sa dihang gi-isa sa mga biktima ang tubo nga gigamit isip usa ka antenna, aksidente nga natumba ang tubo ug na igo ang usa ka buhi nga wire sa kuryente, nga maoy nakaingon sa pagkakuryente sa mga managsuon.
Gidala dayon ang duha ka biktima sa labing duol na tambalanan, apan patay na sila sa dihang paghidangat sa tambalanan, dugang na asoy sa taho gikan sa kapulisan.