Ang Department of Agriculture sa Rehiyon 7 (DA-7) mitugyan karong bag-o lang ngadto sa lalawigan sa Bohol ug 177 ka units sa nagkalain-laing mga ekipo sa pang-uma gikan sa Rice Competitiveness Enhancement Fund (RCEF).
Kining mga makinarya o ekipo sa pang-uma gihatag sa sa Philippine Center for Postharvest and Mechanization (PhilMech) sa DA nga naglakip sa 16 units ka 4WD Tractor, 39 ka Hand Tractors, 47 ka Floating Tillers, 1 Rice Precision Seeder, 13 ka Walk Behind Transplanters, 4 Riding Type Transplanters, 17 Rice Reapers, 13 Rice Combined Harvesters, 21 Mini Rice Threshers, ug 7 ka Mobile Rice Mills.
Mokabat sa 22 ka farmer associations (FAs) ang giila isip recipient o nakadawat sa maong mga makinarya o ekipo sa pang-uma.
Ang maong mga FAs gikan sa mga lungsod sa Calape, Catigbian, Buenavista, Dagohoy, Danao, Trinidad, Ubay, Alicia, Batuan, Bilar, Candijay, Carmen, Duero, Garcia Hernandez, Sierra Bullones, ug Valencia.
Matud pa ni DA-7 regional executive director Salvador D. Diputado nga kining ‘farmer-empowerment’ nga inisyatiba ni Kalihim William Dar makigbugno sa pagdagsang sa imported nga bugas ubos sa Rice Tariffication Law (RTL).
Gidugang pa ni Diputado nga ang pagapud-apod sa makinarya sa uma kabahin kini sa ‘farm mechanization component’ sa P10 bilyong Rice Competitiveness Enhancement Fund (RCEF) aron pag seguro nga ang mga mag-uuma sa nasod mahatagan ug paagi sa pagpaubos sa gasto sa produksyon ug pag-uswag sa ani sa uma.
Ang PhilMech, ubos sa mechanization component sa RCEF, gitahasan sa paghatag sa gikinahanglang mga makinarya sa pang-uma sa tanang rice-producing municipalities sa nasod.
Gisaksihan ang turnover ceremony nga gipahigayon niadtong Oktubre 9, 2020, sa Bohol Agricultural Promotion Center (APC) sa syudad sa Tagbilaran nilang Bohol 1st District Cong. Edgar Chatto, 2nd District Cong. Erico Aristotle Aumentado, representante ni 3rd District Cong. Kristine Alexie Tutor, Provincial Agriculturist Dr. Larry Pamugas nga nagrepresentar ni Gob. Arthur Yap, ug Jai Hinautan nga representante usab ni Senador Cynthia Villar. (PIA)