Mokabat sa P238,000 nga kantidad sa gituohang shabu ang nasakmit sa kapulisan human sa usa ka buy bust operation nga gipahigayon sa dakbayan sa Tagbilaran niadtong adlaw Martes, Okt. 13, 2020, matud pa sa taho sa kapulisan didto sa Kampo Dagohoy.
Subay niini, nasikop sa kapulisan ang tulo ka mga gikatahapan, dugang pa sa taho.
Nasikop sa kapulisan sa Tagbilaran ubos sa pagdumala ni Lt. Col. Mary Crystal Peralta atol sa usa ka buy bust operation ang mga suspek nga gipaila nga sila si Jarvis Brandon Maslog, 33, ug lumulupyo sa dalan VP Inting, barangay Bool ning dakbayan, Mark Anthony Lumacang, 23, nga taga Purok 1, barangay Poblacion 1, Tagbilaran ug si Ryan Arapoc, 37, taga Purok 4, barangay Poblacion 1, Tagbilaran.
Ang buy bust operation didto gipahigayon sa Angalot st., barangay Bool ning dakbayan.
Nakuha sa mga suspek ang giruohang shabu nga adunay gibug-aton nga 35 gramos nga adunay Dangerous Drugs Board value nga mokabat sa P238,000.
Gidala sa kapulisan ang mga suspek sa istasyonan sa pulis aron ibalhog sa karsel. Ang mga gikatahapan nag-atubang karon ug tukmang sumbong sa ilang kalapasan sa Akta Republika 9165 kon Dangerous Drugs Act of 2002.