Nagmugna og “Error Watch” ang Department of Education (DepEd) aron modawat ug mga sumbong sa mga sayop sa modules nga gipang-apud apud karon sa tulunghaang publiko.
Matud pa sa pahayag nga gipagawas sa DepEd, ang mga sayop nga makita sa self-learning modules mahimo nang i-taho ngadto sa “DepEd Error Watch”.
Mahimong ipadala ang sumbong pinaagi sa email, text o viber, messenger ug workchat.
Bisan ang mga sayop nga makita sa DepEd TV ug DepEd Commons, mahimo na usab nga ipadala ngadto sa maong departamento.
Ang mga sumbong mahimong ipadala pinaagi sa text number 09616805334; email address nga errorwatch@deped.gov.ph; sa messenger DepEd Error Watch ug Workchat nga DepEd Error Watch.
Una nang nanawagan ang DepEd nga dili lang unta pakaulawan ang mga nagpaluyo sa module ug i-address ug tarungon lang ang pagtaho kung aduna may reklamo nga dili na moagi ug post sa social media.
Hangyo pa sa DepEd nga magtinabangay ang tanan aron mapalambo ang edukasyon—mapa-modular man, online, TV, o radio-based instruction. (PIA)