Ang Tawag 

EBANGHELYO (Mateo 22: 34-40)

Sa pagkadungog sa mga Pariseo nga ang mga Saduseo gilupig ni Jesus sa katarongan, nagpanon sila sa pagduol kaniya, ³⁵ ug unya usa kanila, nga magtutudlo sa Balaod, misulay pagbitik kaniya pinaagig pangutana. ³⁶ “Magtutudlo,” nangutana siya, “unsa man ang labing dakong sugo sa Balaod?” ³⁷ Si Jesus mitubag, “ ‘Higugmaa ang Ginoo nga imong Dios sa tibuok mong kasingkasing, sa tibuok mong kalag, ug sa tibuok mong hunahuna.’ ³⁸ Kini ang labing dako ug ang labing importanting sugo. ³⁹ Ang ikaduha nga labing importanting sugo sama sa una: ⁴⁰ ‘Higugmaa ang imong isigkatawo ingon sa imong kaugalingon.’ Nagsukad niining duha ka sugo ang tibuok Balaod ni Moises ug ang mga pagtulon-an sa mga propeta.” Ang Ebanghelyo sa Ginoo.

oOo

KAHULOGAN SA EBANGHELYO (Mateo 22: 34-40)

³⁴ Sa pagkadungog sa mga Pariseo nga ang mga Saduseo gilupig ni Jesus sa katarongan, nagpanon sila sa pagduol kaniya, ³⁵ ug unya usa kanila, nga magtutudlo sa Balaod, misulay pagbitik kaniya pinaagig pangutana.

Matag usa kanato nakadungog gayod sa pangutana, “Ikaw. Unsa may imong gituohan?” Kasagaran kanato dili buot nga makadungog sa maong pangutana, labi na kon adunay pagbitik sa pagpangutana niini. Si Jesus wala makalikay niining maong pagbitik. Ang mga kadagkoan sa tibuok lungsod naniid kaniya kon anus-a si Jesus masayop. Nagkahiusa ang mga kadagkoan sa politika ug sa relihiyon sa pagpakigbatok kaniya. Mao nga niining panahona na usab ang mga Pariseo nagpadala og usa ka batid sa kasulatan aron sa pagbitik kaniya.

³⁶ “Magtutudlo,” nangutana siya, “unsa man ang labing dakong sugo sa Balaod?”

Ang mga magtutudlo sa Balaod milista og 613 ka mga sugo: 365 niini ang gitawag og interdicts o mga gidili nga buhaton ug 248 ka mga commandments o mga gisugo nga kinahanglang buhaton. Salamat niini tungod kay ang mga Judio sulod sa tibuok adlaw maghunahuna gayod sa Ginoo. Apan, sa laing bahin, sila usab nagpatental sa pagtimbangtimbang kon unsay mas mahinungdanon sa mga balaod ug sa dili mahinungdanon sa balaod sa tanang higayon.

Sa akong pagsunod sa mga balaod, may giisip ba ako nga mas mahinungdanon kay sa uban? O aduna ba akoy gitawag og radical option o usa ka prinsipyo nga akong makusganong gibarogan ug gikan niana nagasukad ang ubang mga prinsipyo sa kinabuhi? Sa atong panahon nga anaa ang pagkamabalhinon, mibarog ba ako sa unsay angay nga barogan?

^37a Si Jesus mitubag, “ ‘Higugmaa…

Ang kinatibuk-an nga kinabuhi ug misyon ni Cristo anaa magasukad niining maong pulong “higugmaa”. Diha niini, siya mipadayag kanato sa misteryo sa Iyang kinabuhi. Tungod sa kamubo sa maong pulong, tingali dili kaayo nato mahatagan og seryosong pagtagad. Apan kon hatagan gayod nato og lawom nga paghunahuna, anaa baya hinoon niini ang tinuod nga kahulogan sa atong kinabuhi. May kadugtungan kini sa bisan unsang panghitabo sa kinabuhi.

^37b ‘Higugmaa ang Ginoo nga imong Dios sa tibuok mong kasingkasing, sa tibuok mong kalag, ug sa tibuok mong hunahuna.’ ³⁸ Kini ang labing dako ug ang labing importanting sugo.

Sa iyang tubag, si Jesus mipupo sa “Schema Israel”, nga mao ang matag adlaw nga pag-ampo sa mga Judio (Deut. 6:4-7). Kini mao ang hinungdan ngano nga si Jesus daw wala na magkinahanglan og igong panahon aron sa pagtubag sa pangutana, kondili daw anaa na dayon sa iyang mga ngabil kon unsay iyang isulti. Sa maong tubag iya usab nga gipadayag kon unsang kinabuhia ang iyang gipuy-an: ang matag adlaw nga pakigsuod sa Dios.

Diha sa pagka tinuod nga tawo ni Jesus, si Jesus migamit sa iyang tawhanong kahimanan alang sa mahigugmaong pagdangop ug pakigsuod sa Dios. Ang iyang labing unang gihigugma mao gayod ang Dios. Usa ka dakong sayop ang paghunahuna nga ang mga gihimo ni Jesus mao lamang ang pagtabang sa isigkatawo o pagpakita kon unsay inigsoong paghigumaay o brotherly love. Ang tinuod mao nga siya nakahimo niini kay iya man nga gipasukad ang paghigugma sa isigkatawo diha sa paghigugma sa Dios.

Ingon ba usab niini ang akong paghigugma sa Dios: ‘sa tibuok kong kasingkasing, sa tibuok kong kalag, ug sa tibuok kong hunahuna.’

³⁹ Ang ikaduha nga labing importanting sugo sama sa una:

Bisan pa kon ang batid sa kasulatan nangutana lamang sa usa ka balaod maoy labing mahinungdanon, si Jesus misulti kabahin sa ikaduha nga kinutlo gikan sa Basahon sa Levitiko (Lev. 19:18).

Kini nagpasabot lamang nga dili nato mabulag kining duha ka mga kasugoan. Dili kita makahigugma sa Dios lamang ug dili na sa tawo. Dili usab mahimo nga mahigugma lamang kita sa tawo ug dili sa Dios. Ang duha mag-uban gayod! Matud pa ni Jesus dili lamang kay adunay “usa” ka sugo, kondili “duha” ka sugo.

^40a ‘Higugmaa ang imong isigkatawo ingon sa imong kaugalingon.’

Ang Krus nga gibarog sa bukid sa Kalbaryo adunay duha ka kahoy: ang pababag (horizontal) nga nagagakos sa tanang tawo; ug ang patindog (vertical) nga nagkawhat sa langit.

Dili lamang diay kon kinsay palabihon: ang Dios ba o ang tawo; ang langit ba o ang yuta; ang pag-ampo ba o ang pakigsuod lamang sa isigkatawo.

^40bNagsukad niining duha ka sugo ang tibuok Balaod ni Moises ug ang mga pagtulon-an sa mga propeta.”

Duha ka gugma nga susama, apan dili mabulag. Walay usa kanila nga makatindog sa iyang pagkasiya. Pulos sila gikinahanglan kanato kon kita mopuyo sa kinabuhi sa gugma!