Wala’y Authorized Person Outside Residence (APOR) nga makasulod sa Bohol bisan sa labing mubo nga higayon, kon dili kini siya makigsabut pag-una sa local nga kagamhanan nga iyang paga-abtan. Kini aron maseguro nga duna siya’y quarantine facility nga paga-abtan, may kasakyan nga ikatagana alang kaniya ug aron mapatuman gayud ang local nga health protocols.
Kini maoy unod sa bag-o lamang nga gipagawas nga guidelines o lagda sa pagpasulod sa mga APOR sa Bohol nga aprobado sa Bohol Inter Agency Task Force (BIATF) sa usa ka tigum niadtong Oktubre 5, 2020.
Pinaagi usab sa iyang pagpakigsabut sa LGU, makuha gikan sa LGU Focal Person ang pangalan sa APOR ug ang mga dokumento nga gikinahanglan sa iyang pagsulod sa Bohol aron ikaduso ngato sa BIATF alang sa pagpagawas sa clearance o pagtugot sa iyang pagsulod.
Una niini, kinahanglan ang APOR nga magpadala ug sulat-hangyo ngadto sa BIATF nga pagatugotan ang APOR nga makasulod sa Bohol, ug didto sa suwat isaysay ang mga petsa sa iyang laraw nga byahe, sa ato pa ang petsa sa pag-abut ug pagbiya sa Bohol, ug ang gitumbok nga lugar nga iyang paga-adtoan samtang ania siya dinhi sa Bohol.
Pangayoon usab sa BIATF ang iyang mission order, work order o appointment letter aron mapiho ang iyang tuyo.
Sa iyang pagpakigsabut sa LGU, kinahanglanon sa BIATF ang Suwat Pagdawat (Letter of Acceptance) sa LGU nga paga-anhaan, ug kinahanglan nga makabutang didto nga adunay bakante nga quarantine facility alang sa APOR, nga adunay nakatagana nga sakyanan ug driver nga magkuha sa APOR gikan sa pantalan o tugpahanan paingon sa quarantine facility, magkuha sa APOR gikan sa quarantine facility paingon sa adtoan nga tuyo, ug maghatud kaniya balik sa quarantine facility hangtud sa paghatud sa APOR ngadto sa pantalan o tugpahanan sa iyang pagbiya.
Importante usab kini tungod kay ang byahe sa APOR magsubay gayud sa estrikto nga protocols samtang ang driver ug transport personnel, sa kanunay magsul-ob ug protective personal equipment agig panalipod sa pagtakud unya.
Pangayoan usab ang APOR sa medical certificate gikan sa usa ka lisensyadong doktor sa iyang gigikanan, ug kini kinahanglang makuha 48 oras sa dili pa himuon ang byahe, ug magsaysay didto nga ang APOR walay simtomas sa sakit ug nga kini dili aktibong kaso sa sakit nga COVID.
Kung ang APOR mopundo sa Bohol sa ubos pa sa lima ka adlaw, kinahanglan kining magpakita sa orihinal nga kopya sa negatibo nga RT PCR result, nga nakuha 48 oras sa wala pa ang iyang pagbyahe, ug nga kini nga resulta gikan gayud sa DOH accredited molecular laboratory.
Alang sa APOR nga molapas pa sa 5 ka adlaw nga pagpundo dinhi, dili siya pangayoan pa ug negatibo nga RT PCR test results, apan pugos kining pangayoan sa resulta human sa ika lima ka adlaw nga pagkwarantina human siya moabut dinhi.
Samtang nagpaabut sa resulta, dili siya tugotan nga mobiya sa kwarantina hangtud nga mogawas ang negative nga resulta sa iyang RT PCR.
Kung may kompleto siya nga mga dokumento, sabutan sa APOR ug LGU ang iyang byahe, ug sa pagabut sa APOR, sugaton kini sa sakyanan sa LGU ug sa driver ug dalhon diretso nagdto sa quarantine facility.
Alang sa APOR nga magdugay pa sa sobra sa lima ka adlaw, kuhaan siya sa RT PCR test sa ika lima nga adlaw sa pagkwarantina ug maka-adto lamang sa iyang tuyo nga adto-an nga walay inter-aksyon sa ubang mga tawo nga dili lakip sa iyang tuyo.
Sa APOR nga ang iyang pagsulod sa Bohol dili makaabut sa lima ka adlaw, mahimo siyang ideretso ug hatud sa iyang tuyo, unya ihatud dayon sa iyang tumbok nga quarantine facility, samtang kuhaon siya ug ihatud ngadto sa iyang tuyo ug kuhaon usab kon mahuman ang usa ka adlaw o mahumanang iyang trabaho.
Didto sa lugar nga iyang tuyo, dili siya mahimong adunay pakighimamat sa mga tawo nga walay lakip sa iyang pag-bisita dinhi ug dili usab mahimo nga molakaw siya nga wala sa iyang tumbok nga aprobadong itinerary.
Ang pagkaon sa APOR, kinahanglang puston ug dili kini mahimong sawhan sa ubang APOR.
Kon sa iyang pag-anhi, may mga simtomas nga manggawas, ideresto dayun siyag kwarantina ug itugyan sa LGU medical team alang sa dinali-an nga RT PCR testing ug nga ang mga modulong kaniya, magsul-ob gayud sa PPE.
Sa pagkahuman sa tuyo sa APOR, ihatud usab siya dayun sa pantalan o tugpahanan sa sakyanan sa LGU nga mingdawat.
Kon sa iyang pagbiya sa Bohol, may manggawas nga simtomas sa COVID-19 sulod sa 14 ka adlaw, obligado usab ang APOR nga ipahibaw sa mga tinugyanan sa Bohol aron makapasugod dayun sa contact tracing sa mga tawo nga gikaduol sa APOR samtang mianhi dinhi. (PIA)