Sugod niadtong Huwebes, Oktubre 22, 2020, gi-uswag ang oras sa curfew nga gipahamtang sa dakbayan sa Tagbilaran.
Sa iyang Facebook post, gipahibalo ni Tagbilaran City Mayor John Geesnell ‘Baba’ Yap II nga gi-uswag ang oras sa curfew sa syudad sugod a las 10:00 sa gabii hangtud sa a las 4:00 sa kaadlawon.
Gawas niini, gipahibalo usab sa mayor nga ang bag-ong City Hall Park magpatuman ug utlanan (limit) sa takna sa pagpasulod sa mga tawo aron mapatuman ang social distancing protocol.
Samtang gipahinumdoman usab ang publiko nga ang schedule sa pasundayag sa musical fountain nga nahimutang atbang sa Tagbilaran City Hall gikan alas 7:00 hangtod alas 8:00 matag gabii gawas lamang sa adlaw nga Lunes.
Si Yap mipahinumdom usab sa mga katawhan sa pagbisita sa ilang mga minahal sa kinabuhi nga mipanaw na ngadto sa laing kalibutan. Ang iyang gipasabut mao ang atong mga mahal sa kimabuhi nga anaa gitumod sa mga lubnganan sa mga sam-ang (sementeryo). Tungod niini, mipagawas si Mayor Baba Yap ug sa iyang Executive Order No. 35.
Gilatid sa maong EO 35 kining mosunod:
- Nga sugod Oktubre 15 hangtod Oktubre 28, 2020 ug gikan Nobyembre 5 hangtod Nobyembre 15, 2020, trenta por siento (30%) lamang sa kapasidad sa mga sam-ang ang gitugotang pasudlon.
- Adunay 45 minutos lamang nga gitugot nga gidugayon sa pagbisita sulod sa mga sam-ang ug apil na niini ang pag pagpahigayon ug misa kun duna man gani pagahimoon nga misa.
- Kinahanglan usab nga magsuot ug face mask ug face shield ang matag usa nga mosulod sa sam-ang lakip na ang pagpatuman sa social distancing.
- Gidili usab ang pagdala ug mga pagkaon sa sulod sa mga mga sam-ang sa dakbayan.
- Nahilatid usab sa maong EO nga sugod Oktubre 29, 2020 hangtod Nobyembre 4, 2020, sarado ang tanang pampubliko ug pribadong mga sam-ang lakip na ang mga memorial parks.
Apan wala mahi-apil niining maong EO ang kalihukan sa paglubong diin 10 lamang ka mga “immediate family members” ang makatambong sa seremonyas sa paglubong sulod sa sam-ang kun sementeryo. Gawas sa 10 ka “immediate family members” adunay pay laing 10 ka mga tawo ang gitugutan nga makasulod sa sam-ang sama pananglit sa : pari/ministro, trabahante sa sam-ang, etc.
Gawas pa niini, 45 minutos lang usab ang gitugot sa pagpahigayon sa memorial services diin kinahanglang magsuot ug face mask, face shield ug sundon ang 1 ka metro nga physical distancing sa mga tawo nga mutabang sa pagpahigayon sa seremonyas sa lubong.(PIA)