Ang Tawag

EBANGHELYO (Mateo 5:1-12)

¹Sa pagkakita ni Jesus sa katawhan, mitungas siya sa bungtod ug milingkod didto. Unya mialirong ka­niya ang iyang mga tinun-an, ²ug gitudloan niya sila niining mosunod:

³“Bulahan ang miila nga sila kabos sa mga butang espirituhanon, kay ila ang Gingharian sa langit!

⁴“Bulahan ang nagsubo, kay lipayon sila sa Dios!

⁵“Bulahan ang mapaubsanon kay makadawat sila sa gisaad niya!

⁶“Bulahan ang nagtinguha sa pagtuman sa kabubut-on sa Dios, kay tagbawon niya sila!

⁷“Bulahan ang magmaloloy-on, kay kaloy-an sila sa Dios!

⁸“Bulahan ang putli og kasing­kasing, kay makakita sila sa Dios!

⁹“Bulahan ang naningkamot nga managdait ang katawhan, kay isipon sila sa Dios nga iyang mga anak!

¹⁰“Bulahan ang gilutos tungod sa ilang pagsunod sa kabubut-on sa Dios, kay ila ang Gingharian sa langit!

¹¹“Bulahan kamo kon bugalbugalan ug daugdaogon sa mga tawo, ug butang­butangan sa tanang matang sa kadaotan tungod kanako. ¹²Paglipay ug pagmaya kamo, kay dako ang ganti nga gitagana alang kaninyo didto sa langit.” Giingon usab nila niini pagpasipala ang mga propeta nga nahiuna kaninyo. Ang Ebanghelyo sa Ginoo.

oOo

KAHULOGAN SA EBANGHELYO (Mateo 5:1-12)

^1aSa pagkakita ni Jesus sa katawhan…

Sa pagsugod pa sa iyang ministeryo, si Jesus gilibutan sa daghang mga ordinaryong mga tawo. Si Cristo nakig-uban sa mga tawo nga anaa sa “ubos” nga pagkabutang (tan-awa sa Mt 4:23; Mt 9:36).

^1bmitungas siya sa bungtod ug milingkod didto. Unya mialirong ka­niya ang iyang mga tinun-an, ²ug gitudloan niya sila niining mosunod:

Tinuyoan ni Mateo nga iyang ihulagway sa pagka-halangdon o katahum nga talan-awon kining maong kasaysayan. Si Jesus usa ka mapaubsanong tawo, apan diha sa Ebanghelyo sumala ni Mateo si Jesus gihulagway usab nga “ang Hari sa Himaya”. Ang bungtod nga maoy dapit nga giwalihan wala lamang maghatag og nindot nga detalye, kondili naghatag og kahulogan sa Bag-ong Balaod nga karon gisugdan sa pagsaysay. Mao kini ang Bag-ong Sinai, usa ka dinan-agan nga bukid diin ang Ginoo mamulong.

Ug si Jesus mao ang Bag-ong Moises, ang Maghahatag sa Balaod ug ang Mangluluwas sa tanang mga naulipon.

Kita nga nakasinati sa daghang mga “ubos” nga nahimutangan sa atong pagpakabuhi angay nga kita maminaw. Ang Ginoo adunay mahinungdanong isulti ngari kanato. Busa kinahanglan nga ato siyang paminawon. Paminaw kay ania ang usa ka maayong balita — nga adunay kausaban sa atong mga nahimutangan.

“Bulahan… Bulahan… Bulahan…

Mao kini ang labing unang pulong sa matag usa nga gipamulong sa “wali sa bungtod”.

Bulahan…Blessed sa Iningles…Makarioi sa Griego… Asherei sa Hebreo…

Oo, ang tema sa labing unang wali ni Jesus mao ang pagka-bulahan. Sa ato pa, ang kalipay o himaya. Kini mao ang kinatibuk-an sa Ebanghelyo nga mao ang “Maayong Balita”.

Kristohanon, nasayod ka ba nga anaa diay ikaw sa kahimtang nga malipayon? Kon wala ikaw nianang maong kalipay, ngano kaha? Apan nasabtan ba usab nato kon unsang matanga kining maong pagkabulahan? Bulahan ba niining kinabuhia o bulahan ba nga atua sa sunod nga kinabuhi?

³“Bulahan ang miila nga sila kabos sa mga butang espirituhanon, kay ila ang Gingharian sa langit!

“Kabos” nga sa Hebreo “anawim”. Usa ka larawan sa usa ka tawo nga dili makabangon sa iyang kaugalingon tungod sa kaluya. Kini mao kadtong mga tawo nga nawad-an sa ilang tawhanong katungod ug bili. Sila ang wala na hatagi og pagtahod. Si Jesus mismo nakasinati niini sa dihang gisakit siya ug gipatay pinaagi sa balabag sa krus.

⁴“Bulahan ang nagsubo, kay lipayon sila sa Dios!

Mao kini ang nasinati ni Jesus panahon sa kamatayon ni Lazaro sa iyang paghilak uban nila ni Marta ug Maria.

⁵“Bulahan ang mapaubsanon kay makadawat sila sa gisaad niya! ⁶“Bulahan ang nagtinguha sa pagtuman sa kabubut-on sa Dios, kay tagbawon niya sila!

Si Jesus hingpit nga mituman sa Kabubut-on sa Amahan.

⁷“Bulahan ang magmaloloy-on, kay kaloy-an sila sa Dios!

Si Jesus nagpakita sa iyang talagsaong kaluoy labi na ngadto sa mga makasasala. Siya mipasaylo… mipasaylo… mipasaylo…

⁸“Bulahan ang putli og kasing­kasing, kay makakita sila sa Dios!

Makita kini kanato diha kang Jesus tungod kay ang anaa sa iyang kasingkasing mao man usab ang iyang gisulti ug gibuhat.

⁹“Bulahan ang naningkamot nga managdait ang katawhan, kay isipon sila sa Dios nga iyang mga anak!

Katuyoan ni Jesus nga maanaa gayod ang kalinaw. Shalom mao ang iyang mga pulong sa iyang paghimamat sa uban.

Pagkabulahan gayod kadtong mga nahimong instrumento sa panaghiuliay: ngadto sa mga nag-away nga mga managtiayon, nagkabangi nga mga higala o silingan, mga nagkasumpaking katawhan. Walay mas labaw pa nga atong ikagasa ngadto sa atong mga isigkatawo…”Ang kalinaw ibilin ko kaninyo; ang akong kalinaw ihatag ko kaninyo, kalinaw nga dili ingon sa ikahatag sa kalibutan” (Juan 14:27).

¹⁰“Bulahan ang gilutos tungod sa ilang pagsunod sa kabubut-on sa Dios, kay ila ang Gingharian sa langit! ¹¹“Bulahan kamo kon bugalbugalan ug daugdaogon sa mga tawo, ug butang­butangan sa tanang matang sa kadaotan tungod kanako. ¹²Paglipay ug pagmaya kamo, kay dako ang ganti nga gitagana alang kaninyo didto sa langit.” Giingon usab nila niini pagpasipala ang mga propeta nga nahiuna kaninyo.

Ang pagkabulahan nga gisulti ni Jesus dili usa lamang ka saad nga ato ra unyang matagamtaman didto sa langit. Ang maong kahimtang sa pagkabulahan ania na kanato samtang ania pa kita naningkamot sa pagpakabuhi niining kalibutana. Pinaagi sa atong nagkadaiyang mga paningkamot gipabati na kita sa atong pagkabulahan. Makita kini sa mga katawhan nga bisan anaa sa kalisod ug kasakitan, nagpakita sa kalipay. Ang mga tunok wala makapugong sa pagpabuklad sa mga bulak.

Sa katapusan, kining maong kalipay mao diay ang “Gingharian sa Dios” nga atong gisugdan sa pagtukod labi na diha sa Gagmayng Simbahanong Katilingban (GSK).