Ang Bohol Police Provincial Office (BPPO) nakaangkon ug mga bag-ong armas ug bala gikan sa Philippine National Police (PNP) general headquarters nga nagbase didto sa Camp Crame.
Nahitabo ang pagtunol sa maong mga armas ug bala niadtong Okt. 24, 2020 didto sa Kampo Francisco Dagohoy dinhi sa dakbayan sa Tagbilaran.
Mitambong sa pagtunol sa maong mga armas ug bala si Regional Director Brig. Gen. Albert Ignatius Ferro ug gitugyan ang mga armas ug bala sa usa ka yanong seremonyas. Gitunol ni Ferro ang 60 ka book nga mga Basic Assault Rifle Galil 5.56mm nga mokabat sa P 4.4 milyon ang kantidad.
Dugang pa sa taho, apil sa gitunol mao ang 12,600 ka book nga bala alang sa 5.56 mm nga rifle, 69 mga ka instruction manuals, cleaning kits, ug 152 undershirt vests level 3A, ug 1,500 ka book nga mga bala sa M163 nga matang sa pusil.
Nilawas nga gihatud ni Ferro ang mga nahisgotan nga mga armas ug bala ug gitunol kini ngadto ni BPPO director Col. Joselito Clarito. Mao kini ang ikalima nga higayon nga miduaw si Ferro dinhi sa lalawigan sa Bohol.
Gisaksihan ang maong pagtunol sa mga bag-ong sa armas ug bala ni Bise Gobernador Rene Relampagos ug ni Board Member Ricky Masamayor.
Si Masamayor mao ang chairman sa committee on peace and order sa Sanggunuang Panlalawigan.
Matud pa ni Ferro, ang mga bag-ong armas ug bala apil sa programa sa kapulisan nga gilangkoban sa Patrol Plan 2030 o kon modernization program sa nasudnong kwerpo sa kapulisan.
Dugang pa ni Ferro nga dakong tabang ang maong bag-ong armas ug bala sa tinguha nga magpabiling linaw ang lalawigan ug pakigbisog sa kapulisan batok sa mga kriminal ug mga rebeldeng bahan.