Ang temporaryong Corella Municipal Fire Station sa Bureau of Fire Protection (BFP) pormal nga gibuksan niadtong adlaw nga Miyerkules, Okt. 28, 2020.
Nanguna sa mitambong sa pagbukas sa Corella Municipal Fire Station sa BFP mao sila si Bohol Provincial Fire Marshall Fire Chief Inspector Raul Bustaliño ug si Corella Mayor Hilario Tocmo.
Ang gibuksang temporaryong fire station nahimutang didto sa barangay Poblacion sa nahisgotang lungsod. Nahimutang ang fire station sa Bagsakan Center nga gipanag-iya sa local government unit (LGU).
Matod ni Bustaliño nga gilagdaan ang usa ka memorandum of agreement tali sa BFP ug kagamhanang local sa Corella alang sa pagamit sa maong luna isip temporaryong fire station. Usa ka fire truck nga gipanag-iya sa Tagbilaran City Fire Station ang moserbisyo sa Corella Fire Station ug kini ang moresponde kon ugaling adunay sunog.
Usa ka moderno nga fire station ang gilaraw nga tukuron sa maong lungsod nga nagkantidad ug P7.2 milyon.
Gigahinan ug pondo gikan sa panudlanan sa nasudnong buhatan sa BFP ang gilaraw nga permanenteng fire station sa lungsod sa Corella.