Kapin sa 1,500 ka mga gagmay negosyante sa merkado publiko sa Ubay ang nakadawat ug hinabang gikan sa kagamhanan ug sa Buhatan ni Senador Bong Go niadtong Octubre 23-24, 2020 sa kalihukan nga nagatamud sa social distancing aron malikayan ang coronavirus disease (COVID) atol sa tulo ka hugna nga pagpanghatag ug hinabang sulod sa Ubay Municipal Gymasium.
Gawas sa gihatag nga mga pagkaon, gipang-apud-apod usab sa mga sakop sa buhatan ni Senador Bong Go ang face masks, face shields ug mga bisekleta ngadto sa mga tawo nga naglisud ug pagpangita ug sakyanan tungod kay mikunhod ang gidaghanon sa mga sakyanan nga pasahero-an nga nagdagan sa kadalanan. Mihatag usab ang mga sakop sa senador ug mga tablet computers sa mga pinili nga mga benepisaryo nga kasagaran mga kabataan aron may magamit sila sa ilang online classes alang sa blended learning modality nga gisagop sa Department of Education.
Sa kinatibuk-an nga 1,573 ka mga mamaligyaay sa merkado sa Ubay, 400 niini ang mingdawat sa hinabang sa unang adlaw, samtang 1,173 usab ang mingdawat sa susamang hinabang sa duha ka hugna nga pagpanghatag ug hinabang sa sunod nga adlaw.
Matud pa ni Senador Go, kinsa nakig-uban sa mga taga Ubay pinaagi sa ‘online presence’, ang kalisud sa pagpanginabuhi ilabi na sa mga namaliya sa mga merkado, angay hatagan ug bisan gamay nga alibyo sa ilang pagpaningkamot.
Sa iyang gihatag nga mga ‘tablets’ ngadto sa mga estudyante nga mingdawat niini, mipahimangno ang Senador nga unta sila magtarong sa ilang pag-eskwela tungod kay ang edukasyon maoy puhunan sa kinabuhi.
Gawas sa mga tinugyanan sa Buhatan sa senador, nanghatag usab ang mga tinugyanan sa Department of Social Welfare and Development (DSWD) sa tabang pinansyal alang sa mga ‘individuals in crisis situations’ (AICS).
Ang senador naghimo sa kalihukan dungan usab sa pagbukas sa Malasakit Center didto sa Don Emilio del Valle Memorial Hospital sa Ubay niadtong Okt 23.
Ang Malasakit Center usa ka ‘one-stop shop’ diin ang upat ka mga ahensya sa gobyerno nga tigtabang sama sa DSWD, Department of Health, Philippine Charity Sweepstakes Office ug PhilHealth, gipahimutang ubos sa usa ka tambalanan, ug mas dali nga maka-alagad sa mga senior citizens, PWDs ug mga kabus nga nasakit. (PIA)