Ang simulation exercise (SIMEX) nagmalampuson ug dinhi nasukod ang katakus sa mga tinugyanan sa balaod sa pagsanong sa mga kakulian susama sa usa ka insidente sa terorismo diin adunay nahitabo nga pagpamomba sa usa ka dapit nga daghang tawo ang posibleng maangin.
Kini maoy gibutyag ni Police Lt. Col. Mary Crsytal Peralta, ang chief of police sa Tagbilaran City Police Station atol sa pakighinabi sa mga sakop sa media niadtong adlaw nga Huebes, Okt. 29, 2020.
Si Peralta maoy nangulo sa SIMEX nga diin nagbansay-bansay ang mga tinugyanan sa pagresponde sa usa ka insidente sa pagpamomba didto sa Dao Public Market ug sa Island City Mall, niadtong adlaw nga Huwebes.
Ang gihimong SIMEX pagpangandam dinhi sa Tagbilaran kon dunay aktwal nga pagpamomba nga mahitabo.
Matod ni Peralta gilantaw sa SIMEX ang mga pamaagi sa pagdumala sa sitwasyon sa mga tinugyanan nga moresponde sa maong emerhensya, lakip ang imbestigasyon aron masuta kon kinsa ang nagpaluyo sa maong ngilngig nga insidente.
Gawas sa mga kapulisan nga sakop sa Tagbilaran City police station, gisalmotan sa mga laing ahensya sa gobierno ang SIMEX.
Gisaksihan ang pagpahigayon sa SIMEX sa mga opisyal sa kagamhanang local sa Tagbilaran pinangulohan ni City Administrator Cathelyn Torremocha, City Health Officer Jeia Pondoc, City Disaster Risk Reduction and Management Office (CDRRMO) Gerrard Lavadia, ug City Tourism Officer May Hope Arcenal.