Ang Tawag 

EBANGHELYO (Mateo 25:1-13)

Si Jesus misugilon og sambingay ngadto sa iyang mga tinun-an. ¹“Niadtong adlawa ang Gingharian sa Langit nahisama sa napulo ka dalaga nga nagdala sa ilang mga suga ug nanglakaw aron pagsugat sa pamanhonon. ²Danghag ang lima kanila ug maalamon ang laing lima. ³Ang mga danghag nagdala sa ilang mga suga apan wala sila magtagana pagdalag lana nga igdudugang ⁴samtang ang mga maalamon nagdalag mga sudlanan nga punog lana uban sa ilang mga suga. ⁵Ang pamanhonon nalangan pag-abot busa nagduka ug nakatulog ang mga dalaga.

⁶“Tungang gabii na kadto sa dihang milanog ang usa ka singgit, ‘Ania na ang pamanhonon! Dali kamo ug sugata siya!’ ⁷Nangmata ang mga dalaga ug giandam nila ang ilang mga suga. ⁸Unya ang mga danghag miingon sa mga maalamon, ‘Bahini kamig diyutay sa inyong lana kay hapit na mangapalong ang among mga suga.’ ⁹Apan ang mga maalamon mitubag, ‘Ayaw! Kay dili na paigo ang lana alang kaninyo ug kanamo. Lakat hinuon kamo sa tindahan ug pagpalit kamog inyong magamit.’ ¹⁰Busa ang mga danghag nga dalaga milakaw aron pagpalit ug lana. Ug sa wala na sila didto, miabot ang pamanhonon. Ang lima ka dalaga nga nakapangandam mikuyog kaniya pagsulod ngadto sa kombira sa kasal ug gisirhan ang pultahan.

¹¹“Unya miabot ang ubang mga dalaga ug misangpit sila, ‘Sir, sir, pasudla kami.’ ¹²Apan ang pamanhonon mitubag, ‘Wala ako makaila kaninyo.’”

¹³Ug gitapos ni Jesus ang sambingay sa pag-ingon, “Busa pagtukaw kamo kay wala kamo mahibalo sa adlaw o sa takna.” Ang Ebanghelyo sa Ginoo.

Kahulogan sa Ebanghelyo: Mateo 25:1-13

¹“Niadtong adlawa ang Gingharian sa Langit nahisama sa napulo ka dalaga nga nagdala sa ilang mga suga ug nanglakaw aron pagsugat sa pamanhonon.

Si Jesus wala magmakuli sa paghatag kanato, sa sinugdanan niining saysay, sa larawan sa kaanyag, kabatan-on ug kasagya: napulo ka mga dalaga. Ang mga napulo ka dalaga nadugangan sa ilang kamadanihon sa ilang pagbitbit og mga suga, naghulat sa usa ka pamanhonon.

Ania nalarawan ang mga timaan sa kamatuoran: si Jesus mao ang pamanhonon ug ang Simbahan—nga gilangkopan natong tanan—mao ang iyang hinigugmang asawa. Si San Pablo nangahas sa paghulagway niini: “Nangabugho ako alang kaninyo sama gayod sa Dios kay sama man kamo sa putli nga dalaga nga akong gisaarang ipakasal sa usa lamang ka lalaki nga mao si Cristo” (2 Corinto 11:2).

Ang sambingay nagpasulod kanato ngadto sa kinailawmang bahin sa Kasingkasing ni Jesus: diin anaa ang paghigugma sama sa usa ka pamanhonon. Sa makadaghan mabasa nato kini isip tema sa Ebanghelyo (tan-awa sa Mk 2:19; Lk 5:34; Mt 9:15; Jn 3:29).

Ang pagkinabuhi sa usa ka Kristyano susama niini: naghinam nga nagmarcha aron sa pagtagbo kang Cristo!

²Danghag ang lima kanila ug maalamon ang laing lima. ³Ang mga danghag nagdala sa ilang mga suga apan wala sila magtagana pagdalag lana nga igdudugang ⁴samtang ang mga maalamon nagdalag mga sudlanan nga punog lana uban sa ilang mga suga.

Ang lima kanila kulang sa pagpangandam. Ang pulong nga Griego mao ang “morai” nga sa ato pa “walay buot” o “buangbuang” (senseless). Sa bibliya ang “moros” mao kadtong nakigbatok sa Dios (tan-awa sa Salmo 14:1). Sa ebanghelyo ang “moros” mao “… nakadungog sa akong gisulti ug dili magtuman niini, mahisama sa usa ka tawong buangbuang nga nagtukod sa iyang balay diha sa balas” (Mt 7:26).

Nagtug-an usab kini sa usa ka labing mahinungdanong panghunahuna (way of thinking, panglihok (way of acting), pangbati (way of feeling), pamarog (way of bearing) nga anaa sa Kristohanon: nga maalamon sa mga pamaagi sa Dios diha sa iyang tibuok kinabuhi. Gilarawan kini sa lima ka mga maalamong dalaga.

⁵Ang pamanhonon nalangan pag-abot busa nagduka ug nakatulog ang mga dalaga.

Nalangan ang pamanhonon. Sa Credo atong gipahayag: “Nagapaabot kami…” Si Jesus moanhi pag-usab aron sa pagbanhaw ug paghukom sa mga minatay. Busa kinahanglan ang pagpangandam!

⁶“Tungang gabii na kadto sa dihang milanog ang usa ka singgit, ‘Ania na ang pamanhonon! Dali kamo ug sugata siya!’

Gilarawan nga ang Dios moabot sa panahon sa kagabihon (tan-awa sa Lk 12:39-40; Mt 24:43-44; Lk 12:20; Mk 13:35-36). “Kay kamo mismo nasayod kaayo nga ang pagbalik sa Ginoo sama sa usa ka kawatan nga moabot sa gabii” (1 Tesalonica 5:2).

Kinahanglan nga sa tanang panahon andam kita aron sa atong pagkadungog sa singgit dali nga makasugat kita sa pamanhonon—si Cristo!

⁷Nangmata ang mga dalaga ug giandam nila ang ilang mga suga.

Sumala sa sambingay ang tanan mga dalaga nahikatulog. Usa kini ka timaan nga kitang tanan pulos mga makasasala.

Apan ang Dios buot nga bisan pa sa atong pagkamakasasala anaa pa untay nahabilin nga kahayag sulod sa atong kasingkasing. Matud pa “Natulog ako, apan nagmata ang akong kasingkasing” (Awit sa mga Awit 5:2).

⁸Unya ang mga danghag miingon sa mga maalamon, ‘Bahini kamig diyutay sa inyong lana kay hapit na mangapalong ang among mga suga.’ ⁹Apan ang mga maalamon mitubag, ‘Ayaw! Kay dili na paigo ang lana alang kaninyo ug kanamo. Lakat hinuon kamo sa tindahan ug pagpalit kamog inyong magamit.’ ^10aBusa ang mga danghag nga dalaga milakaw aron pagpalit ug lana. Ug sa wala na sila didto, miabot ang pamanhonon.

Ang mga maalamong dalagang dili pagaisipon nga nagdinawo gumikan sa ilang walay pagbahin sa lana ngadto sa mga danghag. Dili ba si Jesus sa makadaghang nagtudlo nga gikinahanglan ang pagtan-aw dili sa kaugalingon lamang kondili sa panginahanglanon usab sa uban? Apan ngano kaha nga daw lahi man ang saysay sa sambingay?

Aduna gayoy buot itug-an ni Jesus nga pagtulun-an alang kanato. Ang mga detalye sa saysay nagtulod kanato padulong sa maong pagtulun-an. Pananglitan: Ang tindahan nga bukas sa pa sa tungag gabii nga naghulat og mga pumapalitay; ug ang ilang pagbalik ngadto sa dapit nga himoan sa kasal tapos sila makapalit og dugang lana.

Paminawon nato ang katapusang bahin sa sambingay.

^10bAng lima ka dalaga nga nakapangandam mikuyog kaniya pagsulod ngadto sa kombira sa kasal ug gisirhan ang pultahan. ¹¹“Unya miabot ang ubang mga dalaga ug misangpit sila, ‘Sir, sir, pasudla kami.’ ¹²Apan ang pamanhonon mitubag, ‘Wala ako makaila kaninyo.’”

Ang mga “way buot” o “buangbuang” nga dalaga wala mangandam. Sukwahi sa gibuhat niadtong lima ka mga manggialamon, sila nagmakulangon sa paningkamot. Diha man tuod ang usa ka paningkamot sa pagpalit og dugang lana—apan ulahi na ang tanan.

Buot unta silang mosulod sa ganghaan sa dapit sa kasal—apan ulahi na gayod! Mao kini ang pagtulun-an nga buot ipaambit ni Jesus sa matag usa kanato: nga ang pagpili sa panahon dili atong katungod. Dili kita ang makabuot!

Si Cristo dili ordinaryong pamanhonon. Sa katapusan sa panahon, moanhi siya aron sa paghukom. Matud niya: “Dili ang tanan nga magtawag kanako ‘Ginoo, Ginoo’ makasulod sa Gingharian sa langit, kondili kadto lamang nagtuman sa kabubut-on sa akong Amahan nga atua sa langit” (Mt 7:21).

¹³Ug gitapos ni Jesus ang sambingay sa pag-ingon, “Busa pagtukaw kamo kay wala kamo mahibalo sa adlaw o sa takna.”

Kining maong pamahayag maoy sukdanan kon giunsa nato pagamit ang kagawasan nga gipiyal sa Dios sa matag usa kanato. Ang maong kagawasan maoy basihanan sa atong kaugalingon o personal nga paghukom: Ato bang gipangandaman nga ang atong tibuok nga kinabuhi maoy usa ka dakong pagpaabot sa Ginoo. Ania dinhi magasukad kon hangtod sa hangtud ato bang ikauban ang pamanhonon—si Cristo. Kay kita iyang “gipangasawa”!

Andam na ba ako? Nagbantay ba ako?