Nagpadayon ang pagpangandam sa mga taga City Hall sa himoong online nga pamaagi sa paglukat sa permit alang sa mga patigayon.
Karong umaabot Enero 2021, pagahimuon sa mga tagdumala sa nagkalain-laing patigayon ang pag renew sa ilang mga business permits.
Ang katuyoan sa bag-ong sistema sa paglukat sa business permit mao ang paglikay sa atubangay nga transaksyones. Kini gihimo aron makalikayan sa posible nga pagtakod sa makalilisang sakit nga Coronavirus disease kon Covid.
Ang mga tinugyanan sa departamento sa Business Permits and Licensing Office (BPLO) ug sa Information Technology (IT) diha sa City Hall nakig-alayon sa usa’g-usa aron mahipno ang pama-agi ug sistema diin mahimo na nga makalukat ug permit ang mga magpapatigayon pinaagi sa internet kun on line.
Ang maong proyekto inabagan usab nila City Legal Officer Kathy Blanche Borja-Jamila, Thea Ivory Parras sa BPLO, ug ni Mariano Tambis nga taga IT department.
Gipakita sa mga tinugyanan sa departamento sa BPLO ug sa IT sa City Hall ang bag-ong sistema sa usa ka higayon niadtong milabay nga semana didto sa hawanan sa Sangguniang Panglungsod (SP).
Naila na ang kagamhanang dakbayan sa Tagbilaran sa pag gamit sa teknolohiya aron madugangan ang pundo sa panudlanan sa dakbayan.
Sayo niini, ang kagamhanang dakbayan migamit na ug e-Tagb diin nahimo nga mas sayon ang paglukat sa permits.
Tungod kay sayon na ang paglukat sa permits, nidaghan ang mga patigayon nga milukat sa maong mga papeles nga maoy usa sa mga hinungdan nga nadugangan usab ang pondo sa dakbayan.
Gipasigarbo sa kagamhanang dakbayan ang padayon nga pagtabang sa mga kabus nga nagkinahanglan ug ibayad sa ospital.
Padayon gihapon ang Baskog sa Barangay Health Card diin P20,000 nga kantidad sa subsidiya ang itabang ngadto sa mga kabus. Dili momenus sa 5,000 ka mga kabus ang natabangan ug niabot na sa P51 milyon ang kinatibuk-ang natabang sa kagamhanang dakbayan ngadto sa mga kabus nga nagkinahanglan ug ibayad sa ospital o sa mga bayranan nga adunay kalambingitan sa kasanihan.
Tungod sa pagsaka sa pundo sa kagamhanang dakbayan, nahimo nga mahatagan ug alawans ang mga sakop sa kapulisan sa dakbayan, apil na ang mga magtutudlo sa pampubliko nga tunghaan, ug mga bumbero, matud sa taho sa City Media Bureau.