Malinawon ug walay da-utan nga panghitabo ang nalista dinhi sa Bohol nga adunay kalambigitan sa kasaulugan sa adlaw nga gitawag ug kalag-kalag human nga gi-lockdown ang mga sam-ang gikan Okt. 29 hangtod Nob. 4, 2020, matud pa sa tinugyanan sa Bohol Police Provincial Office (BPPO).
Kini maoy gibutyag ni Major Jacinto Mandal, ang pangulo sa Police Community Relations Office sa BPPO sa usa ka taho nga nadawat sa The Bohol Tribune niadtong Nob. 6, 2020.
Gibuksan ug balik ang mga pribado ug pampublikong sam-ang, memorial park ug columbariums sugod niadtong, Nob. 5, 2020 human natapos ang lockdown nga gimando sa National Inter Agency Task Force (NIATF).
Matod ni Mandal nga nitamod ang mga Bol-anon sa paghimo sa lockdown ug wala gyo’y dautan nga panghitabo nga may kalambigitan sa kalag kalag maong malinawon sa kinatibuk-an ang lalawigan sa Bohol atol sa naasoy nga kasaulogan.
Mipahinumdom si Mandal nga karon nga gibuksan na pagbalik ang mga sam-ang, memorial parks ug columbariums kinahanglan nga motamod gihapon ang mga katawhan sa mga protocol nga gipatuman sa tagsa tagsang kagamhanang lokal.