Gilusad ni Rep. Kristine Alexie Tutor ang iyang kaugalingong patient transport system aron makatabang aa mga pasyente nga kabus nga makaadto sila sa mga tambalanan diin kinahanglan sila magpatan-aw sa mga doktor o kon aduna silay kinahanglang hikayon.
Gitaho kining maong kasayuran ni Tutor ngadto sa The Bohol Tribune atol sa usa ka pakighinabi kaniya niadtong adlawng Biyernes, Nob. 6, 2020.
Iyang gipatin-aw nga ang salapi nga iyang gigamit sa pagpamalit sa na-asoy nga mga sakyanan, gikan sa iyang kaugalingong bulsa ug ang ubang sakyanan donasyon sa mga dili magpaila nga mga personalidad kinsang mga pangalan wala ibutyag sa ni Rep. Tutor agi ug respeto sa mga hungtungdan.
Midugang si kongresista Tutor sa pag-ingon nga ang mga sakyanan nga nahisgutan sa ita-as dili kini mga ambulansya ug walay mga paramedics o mga nars nga mosakay sa maong mga sakyanan. Usa ka drayber ang magdumala sa matag sakynanan ug ang maon drayber gitahasan sa responsibilidad nga muhatud sa mga pasyente ngadto sa mga tambalanan susama sa mga anaa nahimutang sa dakbayan sa Tagbilaran.
Ang suhol sa drayber ug ang gasto sa krudo giabaga gihapon sa kongresista.
Upat ka mga patient transport vehicles (ptv) ang gamiton sa maong proyekto sa kongresista. Usa sa mga sakyanan adto ibutang sa lungsod sa Candijay nga mu-alagad sa mga katawhan nga mga lumulupyo sa lungsod sa Candijay, Guindulman, Anda, Mabini, ug Alicia.
Laing sakyanan ang ibutang didto sa lungsod sa Sierra Bullones ug kini moserbisyo sa mga katawhan sa Sierra Bullones, Pilar, Carmen, ug Batuan.
Dugang pa sa kongresista, laing sakyanan ang ibutang sa lungsod sa Jagna nga moserbisyo sa mga katawhan didto sa Jagna, Duero, Garcia Hernandez, Valencia ug Dimiao.
Ang ika upat nga sakyanan adto ibutang sa lungsod sa Loboc ug makabenepisyo ang mga taga Loboc, Sevilla, Bilar, Loay, ug Lila, sumala pa sa kongresista.
Ang maong mga sakyanan ubos sa proyekto sa kongresista nga Oplan Tabang alang sa mga kabus nga pasyente ug alang usab sa mga gitawag ug persons with disability. Makagamit usab sa maong mga sakyanan kadtong bag-ong gawas pa sa mga tambalanan.
Gipatin-aw ni Tutor nga kining maong proyekto wala maglambingit sa pondo sa bisan unsa nga pangagamhanang nasayonal o local. An salaping gigamit sa maong proyekto gikan gyud sa kaugalingon ug personal nga pondo sa kongresista ug gikan sa mga personalidad nga mihatag ug donasyon alang sa pagpalit sa maong mga sakyanan.