Nakadawat ug pundo ang dakbayan sa Tagbilaran sa kantidad nga P1 milyon gikan sa kagamhanang lalawigan sa Bohol atol sa pagsaulog sa probinsya sa ika-124 nga kasumaran sa adlaw nga natawhan ni ang kanhi pangulo sa nasud nga Bol-anon nga si Carlos P. Garcia niadtong. Gihimo kining maong paghatag sa ayuda niadtong, Myerkules, Nob. 4, 2020.
Gidawat ni Mayor John Geesnell Yap II ang tseke nga nagkantidad ug P1 milyon aron magamit sa panubig sa dakbayan.
Atol sa pagtunol sa hinabang, gisaksihan ang maong pagtunol nila ni Bise Gobernador Rene Relampagos ug Cong. Edgar Chatto.
Matud pa ni City Administrator Cathelyn Torremocha pinaagi sa usa ka pakighinabi sa tulumanon sa radyo nga Open Forum niadtong adlaw nga Huwebes, Nob. 5, 2020 nga gamiton ang maong pondo aron ugmaron ang sistema sa panubig sa City College sa Tagbilaran (CCT).
Matud pa ni Torremocha, sa pagka karon ang CCT wala pa nakaangkon ug maayong tinubdan sa panubig maoy hinungdan nga gilaraw sa kagamhanang dakbayan nga gamiton ang nahisgotan nga pundo alang niini nga katuyuan.
Gipatin-aw ni Torremocha nga adunay koneksyon sa tubig ang CCT apan adunay mga higayon nga mawad-an ug tubig ang maong dapit mao nga kinahanglan ug mga tangke aron gamiton sa pagpondo ug tubig sa higayon nga mohinay ang agas sa tubig sa maong dapit.
Mopalit ug mga tubo sa tangke ang dakbayan ug kini itaod didto sa CCT aron adunay tubig nga muagas sa maong tunghaan.
Ang Tagbilaran apil sa nagkalain laing mga local government unit (LGU) sa Bohol nga nakadawat ug pondo gikan sa kagamhanang probinsyal aron sa pagpaugmad sa panubig.