Ni: Jes B. Tirol
Panglot Nga Diyotay 8, 2020
Usa Ka Balak ni Kanhi Pamunò Nasod
Carlos Polestico Garcia
Pasiuna
Niadtong adlaw nga Dukutdukot, ika-4 sa bulan sa Panglot nga Diyotay atong gisaulog ang adlaw nga natawhan sa labing tinamod nga Bol-anon nga si kanhi Pamunò Nasod Carlos P. Garcia.
Kadto siya giila nga “Prinsipe sa magbabalak sa pinulongan nga sinugboanon”. (Palumangnò:
Ang hari sa mga magbabalak mao si Vicente Ranudo).
Daghan og natagik nga mga balak si Pamuno Garcia Ang atong tukibon karon mao ang usa niya ka balak nga iyang gihalad sa midaog sa “Hara sa Kaanyag”. Dili na matino diin kini niya iluwa (recite).
Adunay nag-ingon nga didto kini sa lungsod sa Valencia o dili ba sa Garcia-Hernandez.
SA IMONG KAMAHALAN
Ni: Carlos P. Garcia
O, hara sa kaanyag ug katahoman
Ning gabii nga labing bulahan
Tugoti nga kami magasabúlak
Og mga mahumót nga mga bulak
diha sa imong tiilan.
Timáan sa mainiton namong pagdalayeg
Ning talagsaong dungog mong naangkon
O hara, kanimo kami nalámat
Ug nanag-ambahan sa pag-anhi
ning dakong hawan
Aron sa pagsaksi ning imong pagsaka
Nianang trono sa dakong garbo
ug kadungganan
Kay ngáni, kadtong diwa sa gugma
nilupád man nganhi
Kay buot motámbong ning halandomong gabii sa imong karonasyon.
Mga bálak gipalánog, alpa midúyog
Sa lalím ug nindot nga kinablit
Pako sa tumang kasádyà
Mibátog ning atong dapit
Ug ang huni sa mga hudyàkà
Milanap sa labihán nga kagahob.
Ug ako kabós intawon nga magbabalák
Way laing ika-gasa ning gabii
sa imong pagdaog
Kon dili ning mga tudling sa akong gáray
nga nagkanayón;
Ang silaw sa adlaw
buot kong panaon
Aron ihalad ko
Sa adtang mo
Nga daw garing {ivory}.
Buot kong sakyan kanang bulan
Ug pûpûon ko
Ang mga lugás sa bitúon
Kay himoong mga pahiyas
Nga akong ikadayandayan
Nianang makabibihag mong katahóm.
Ug sa tanaman sa mga damgong bulawanon
Didto lalika ang lawas mong lison ug katahoman
Sa kasingkasing sa tsampaka, bulak nga harianon
Didto linaa ang dugós sa imong dughan
Sa pandayan sa mga mutyà ilalom sa dagat
Didto pandaya ang mga mutya nianang bâbâ mo
Bâbâ nga silangan sa mga pahiyom mong madanihon
Natawhan sa mga halók masunogon
Ug limot sa mga kasakit ug tambal sa himalátyon
Búså maghara ka, hára, o hára sa kaanyag
Ikaw ang gárbo ning lungsod mong natawhan
Ug samtang nanaghangad kami dibâ kanimo
Among naangkon ang tuman nga kalipay ug himayà
Kay nganì mga kahoy nga dugay nang nangaláyà
Nihanâ man sa pagpanalingsing
Unyà nanglimbásog sa pagpanáhà
Kay gipukaw og nakahánggab
Nianang walay sama nga katam-is sa imong diwà.
O! hara sa kaanyag ug katahoman
Mimandò niining gabii
Gabii nga labing bulahan.