Napulog unom (16) ka lungsod sa Central Visayas (CV) ang gitakdang makadawat ug inbred nga binhi sa humay nga gigahin ubos sa programa sa Rice Competiveness Enhancement Fund (RCEF)-Seed Component, matud pa sa taho gikan sa Philippine Information Agency (PIA) niadtong Nobyembre 10, 2020.
Matud pa ni Department of Agriculture (DA)-PhilRice Central Visayas coordinator Rojen Austria, ang inbred nga binhi sa humay gihatud sa nagkalain-laing lungsod sa lalawigan sa Bohol ug Negros Oriental nga mga gitawag nga RCEF covered areas.
Sa lalawigan sa Bohol, ang mga lungsod nga apil sa listahan mao ang Balilihan, San Miguel, Catigbian ug Cortes; samtang sa Negros Oriental, ang mga nalakip mao ang mga syudad sa Bayawan, Guihulngan, Canlaon, Bais, Tanjay ug mga lungsod sa Sta. Catalina, Mabinay, Jimalalud, La Libertad, Bindoy, Tayasan ug Ayungon, ang maoy makadawat ug binhi.
Si Austria nagkanayon nga ang mga gihatud nga inbred nga binhi sa humay naglakip sa PSB Rc18, NSIC Rc216, NSIC Rc 222 ug NSIC Rc480. Matag bag adunay sulod kining 20 ka kilo sa rekomendadong inbred rice varieties.
Matud pa nga ang lalawigan sa Bohol adunay kinatibuk-ang alokasyon nga 35,970 bags alang sa kinatibuk-ang area coverage nga 17,985 ektarya ug makatagamtam ang 14,388 ka mga farmer beneficiaries.
Samtang ang Negros Oriental adunay kinatibuk-ang alokasyon nga 10,830 bags alang sa kinatibuk-ang area coverage nga 5,415 ektarya nga adunay 4,332 farmer-beneficiaries.
Ang PhilRice maoy lead implementer sa RCEF-Seed Program nga nahisulod sa Republic Act 11203 o ang Rice Tariffication Law.
Adunay tinuig kini nga alokasyon sa pondo nga gigahin alang sa mga mag-uuma sa humay aron matabangan sila nga mamahimong ‘globally competitive.’