Ang tigpamaba sa Bohol Inter Agency Task Force (BIATF) nga si Dr. Cesar Tomas Lopez miingon nga wala makompromiso ang health care system sa Bohol dungan sa padayon nga pagpatag sa kurba sa gidaghanon sa mga kaso sa Coronavirus disease (Covid).
“Wala ma kompormiso ang health care system, kompleto ang atong mga gamit, aduna kitay igo nga mga tawo, igo nga tambal ug igo ang atong mga pasilidad, para pagpanalipod sa atong lalawigan sa Bohol,” matud pa ni Lopez.
Gipadayag kini ni Lopez dungan sa namatikdan nga pagdaghan sa sakit nga natutokan na sa isla nga Barangay sa Maomawan sa Bien Unido, Bohol, na gitaho niadtomg Nobyembre 9, 2020
Sa susamang adlaw, Nobyembre 9, 2020, gitaho ni Lopez nga natumbok na sa mga medical professionals ang tinubdan sa kaso sa Covid sa Maomawan kinsa mao ang usa ka pasyente nga taga didto nga nadala sa Don Emilio Del Valle Hospital sa Ubay tungod sa simtomas sa Covid.
Sa pasiunang contact tracing, matud pa, unom ang nagpositibo sa mga nakaduol sa nahisgutang pasyente samtang sa misunod nga mga contact tracing sa unom ka mga nagpositibo, laing tulo na usab ang nagpositibo sa sakit nga giingon nga second generation contacts.
Sa kinatibuk-an, 10 ang kaso sa Bien Unido, tanan dala sa pagpanakod nga gikan sa mga silinganan lamang usab, sanglit kining tanan nga kaso sa mga nagpositibo nga mga tawo wala mi byahe ug nakaabut sa ubang mga layong lugar.
Tungod niini, gipailawom na sa granular lockdown ang Purok 5 sa barangay Maomawan, aron dili na masabwag pa o makaapekto sa ubang tawo didto, taho ni Dr Lopez.
Matud pa ni Lopez nga dili gyud mahitabo nga magkompyansa ug ang mag-bale-wala sa pagsuot sa face mask ug ang pagpadistansya sa usa o duha ka metros nga physical distancing aron dili kahatagan og kahigayunan ang sakit nga makapanakod.