Ang Tawag

EBANGHELYO (Mateo 25:14-30)

Si Jesus misugilon niining sambingay ngadto sa iyang mga tinun-an, ¹⁴“Sama kini sa usa ka tawo nga hapit na mopanaw; gitawag niya ang iyang mga sulugoon ug gipiyalan niya sa iyang katigayonan, ¹⁵ ug gihatagan silag puhonan sumala sa ilang katakus: ang usa gihatagan niyag lima ka libo ka pisos, ang usa duha ka libo ka pisos, ug ang usa pa gayod usa ka libo ka pisos. Unya mipanaw siya. ¹⁶ Ang sulugoon nga nakadawat og lima ka libo ka pisos milakaw dayon ug gipatigayon niya ang salapi, ug nakaganansiya siya og lima ka libo ka pisos. ¹⁷Ang nakadawat og duha ka libo ka pisos nakaganansiyag duha ka libo ka pisos. ¹⁸Apan ang sulugoon nga nakadawat og usa ka libo ka pisos milakaw ug nagkalot sa yuta, ug gitagoan niya ang salapi sa iyang agalon.” ¹⁹“Tapus sa taas nga panahon, mipauli ang agalon niadtong mga sulugoon ug nangayog husay kanila. ²⁰Ang sulugoon nga nakadawat og lima ka libo ka pisos miadto kaniya ug mihatag sa laing lima ka libo ka pisos. ‘Sir,’ miingon siya, ‘gihatagan mo akog lima ka libo ka pisos; tan-awa, aniay laing lima ka libo ka pisos nga akong naganansiya.’ ²¹‘Maayo, buotan ka ug maayong sulu­goon!’ miingon ang agalon. ‘Sanglit kasaligan ka man sa diyotayng salapi, piyalan ko ikaw sa daghang salapi. Dali, sulod ngari, ug ambit sa akong kalipay!’ ²²Unya misulod ang sulugoon nga naha­tagan og duha ka libo ka pisos ug miingon, ‘Sir, gihatagan mo akog duha ka libo ka pisos. Tan-awa! Aniay laing duha ka libo ka pisos nga akong naganansiya.’ ²³‘Maayo, buotan ka ug maayong sulugoon,’ miingon ang iyang agalon. ‘Sanglit kasaligan ka man sa diyotayng salapi, piyalan ko ikaw sa daghang salapi. Dali, sulod ngari, ug ambit sa akong kalipay!’ ²⁴Unya misulod ang sulugoon nga nakadawat og usa ka libo ka pisos ug miingon, ‘Sir, nasayod ako nga estrikto ka kaayo; nag-ani ka sa wala mo itanom, ug naghipos sa wala mo ipugas. ²⁵Nahadlok ako, busa milakaw ako ug gitagoan ko ang imong salapi sa ilalom sa yuta. Tan-awa, sir, ania aug imong salapi.’ ²⁶‘Walay hinungdan ug tapolan nga sulugoon,’ miingon ang agalon. ‘Nasayod ka man diay nga ako nag-ani sa wala ko itanom, ug naghipos sa wala ko ipugas, ²⁷nganong wala mo man ideposito sa bangko ang akong salapi aron mahibalik kini kanako nga may tubo na? ²⁸Karon, kuhaa kaniya ang salapi ug ihatag ngadto sa sulugoon nga may napulo ka libo ka pisos. ²⁹Kay ang anaay iya hatagan pagdugang, ug makabaton siyag labaw pa sa iyang gikinahanglan; apan ang wala gayoy iya, bisan pa gani ang diotay nga iyaha kuhaon pa gikan kaniya. ³⁰Ug kining walay hinungdan nga sulugoon ilabog ngadto sa gawas nga mangitngit; didto maghilak siya ug magkagot ang iyang ngipon.”’ Ang Ebanghelyo sa Ginoo.

oOo

KAHULOGAN SA EBANGHELYO (Mateo 25:14-30)

¹⁴“Sama kini sa usa ka tawo nga hapit na mopanaw; gitawag niya ang iyang mga sulugoon ug gipiyalan niya sa iyang katigayonan,

Kabahin kini sa gitawag og “eschatological parables” o mga sambingay mahitungod sa katapusan sa panahon. Ang panahon sa kasaysayan sa katawhan (human history) mao ang panahon nga wala diha ang agalon. Ang katawhan pagasulayon, sama sa mga sulugoon nga gipiyalan sa dakong kaakohan. Gisaligan kitang mga tawo nga mohimo kitag mga lihok o initiatives dinhi sa atong pagpuyo niining kalibutana—nga kita magpabungahon. Misalig ang Dios kanato.

¹⁵ug gihatagan silag puhonan sumala sa ilang katakus: ang usa gihatagan niyag lima ka libo ka pisos, ang usa duha ka libo ka pisos, ug ang usa pa gayod usa ka libo ka pisos. Unya mipanaw siya.

Usa kini ka sugilanon mahitungod sa pagpiyal sa katigayonan o stewardship. Ang mga katigayonan nga atong gialimahan dinhi sa ibabaw sa kalibutan sa tinuoray dili gayod atua. Kita mga piniyalan lamang.

¹⁶Ang sulugoon nga nakadawat og lima ka libo ka pisos milakaw dayon ug gipatigayon niya ang salapi, ug nakaganansiya siya og lima ka libo ka pisos. ¹⁷Ang nakadawat og duha ka libo ka pisos nakaganansiyag duha ka libo ka pisos. ¹⁸Apan ang sulugoon nga nakadawat og usa ka libo ka pisos milakaw ug nagkalot sa yuta, ug gitagoan niya ang salapi sa iyang agalon.”

Dili nato isipon nga atong itandi ang atong kaugalingon sa uban. Wala kita maghisgot dinhi og katigayonan nga anaa kanimo o anaa sa uban. Kondili ang gihisgotan mao ang matag usa ka kaakohan nga anaa sa matag usa kanato o personal responsibility. Ang matag usa kanato may tagsatagsa ka tahas nga kita lamang ang makahimo. Sa mata sa Dios ang gibuhat sa matag usa dili kapulihan sa uban kay ang matag usa espesyal.

Ako bang gipabunga ang unsay gihatag kanako o ako ba lamang gitagoan?

¹⁹“Tapus sa taas nga panahon, mipauli ang agalon niadtong mga sulugoon ug nangayog husay kanila.

Taas nga panahon. Usahay tungod sa dugay nga paghulat, nagtuo kita nga ang Dios dili pa moabot. Tingali gipuy-an nato ang kinabuhi nga daw walay Dios nga gipaabot. Ania niini ang kahulogan sa sambingay—nga dili kita magtinapulan, dili kita maglangaylangay, dili kita mag-usik sa kahigayonan. Sa tanang higayon kita magtukaw! Moabot ang panahon nga ang Dios mangayog husay sa atong binuhatan.

²⁰ Ang sulugoon nga nakadawat og lima ka libo ka pisos miadto kaniya ug mihatag sa laing lima ka libo ka pisos. ‘Sir,’ miingon siya, ‘gihatagan mo akog lima ka libo ka pisos; tan-awa, aniay laing lima ka libo ka pisos nga akong naganansiya.’ ²¹‘Maayo, buotan ka ug maayong sulugoon!’ miingon ang agalon. ‘Sanglit kasaligan ka man sa diyotayng salapi, piyalan ko ikaw sa daghang salapi. Dali, sulod ngari, ug ambit sa akong kalipay!’ ²²Unya misulod ang sulugoon nga nahatagan og duha ka libo ka pisos ug miingon, ‘Sir, gihatagan mo akog duha ka libo ka pisos. Tan-awa! Aniay laing duha ka libo ka pisos nga akong naganansiya.’ ²³‘Maayo, buotan ka ug maayong sulugoon,’ miingon ang iyang agalon. ‘Sanglit kasaligan ka man sa diyotayng salapi, piyalan ko ikaw sa daghang salapi. Dali, sulod ngari, ug ambit sa akong kalipay!’

Ang agalon dili yano nga tawo, gitawag siya og Sir o Lord. Ngadto sa maayong sulugoon ang ganti mao ang pag-ambit sa kalipay sa agalon.

²⁴Unya misulod ang sulugoon nga nakadawat og usa ka libo ka pisos ug miingon, ‘Sir, nasayod ako nga estrikto ka kaayo; nag-ani ka sa wala mo itanom, ug naghipos sa wala mo ipugas.

Sumala ni Jesus mao kini ang labing dakong sayop—sa paghunahuna nga ang Dios “estrikto ra kaayo”. Ang atong kalambigitan sa Dios gihimoan og dili hustong pagsabot. Kay ang kamatuoran mao nga ang Dios usa ka mahigugmaong Amahan.

²⁵Nahadlok ako, busa milakaw ako ug gitagoan ko ang imong salapi sa ilalom sa yuta. Tan-awa, sir, ania ang imong salapi.’

Kahadlok! Maoy dakong babag sa panagrelasyon. Ang pagtago maoy usa ka dakong paglikay sa risgo.

²⁶‘Walay hinungdan ug tapolan nga sulugoon,’ miingon ang agalon. ‘Nasayod ka man diay nga ako nag-ani sa wala ko itanom, ug naghipos sa wala ko ipugas, ²⁷ nganong wala mo man ideposito sa bangko ang akong salapi aron mahibalik kini kanako nga may tubo na? ²⁸Karon, kuhaa kaniya ang salapi ug ihatag ngadto sa sulugoon nga may napulo ka libo ka pisos. ²⁹Kay ang anaay iya hatagan pagdugang, ug makabaton siyag labaw pa sa iyang gikinahanglan; apan ang wala gayoy iya, bisan pa gani ang diotay nga iyaha kuhaon pa gikan kaniya. ³⁰Ug kining walay hinungdan nga sulugoon ilabog ngadto sa gawas nga mangitngit; didto maghilak siya ug magkagot ang iyang ngipon.”’

Ang matag usa kanato mao ra diay usab ang naghukom sa kaugalingon. Anaa ra kanato kon ato bang itunol balik ngadto sa Ginoo ang mga bunga sa kakugi o paningkamot! O tagoan lamang!