Desidido ang kagamhanan nga makalista sa labing menos 5 ka milyon ka mga pangulo sa banay nga ubos ang kinitaan, alang sa Philippine ID system (PhilSys) niining tuiga, kini matud pa ni Provincial Statistician Jessamyne Anne Alcazaren, hepe sa Philippine Statistics Authority sa Bohol, ug gitaho kini sa Philippine Information Agency (PIA) niadtong adlaw Myerkules, Nob. 11, 2020.

Tungod sa rason nga sa mga pasangil sa kawat ug pangilkil sa mga benepisaryo sa tabang sa kagamhanan, ang hinabang para sa mga kabus karon ihatag ngadto kanila, ipaagi na sa bangko; ang ID maoy yawi sa ilang pagbukas ug accounts aron mapadali ug dayag ang pagdawat sa hinabang.

Didto sa Kapihan sa PIA, gikabutyag ni Alcazaren nga tungod sa pandemya sa Coronavirus disease (Covid), ang pagpaneguro nga mauna ug hatag sa hinabang ang mga ubos ug kinitsan pinaagi mga sa bangko, mao ang rason ngano nga una nga girehistro ang mga pangulo sa mga pamilya nga ubos ang kinitaan.

Labing menos usa ka myembro sa banay ang makakupot ug nasudnong ID nga mao ang gikinahanglan aron makabukas ug account sa bangko,” matud sa PSA.

Ang PhilSys gimugna sa Republic Act No. 11055 o ang “Philippine Identification System Act” nga nagtumong nga makahimo ug hiniusa nga nasudnong sistema sa pag-ila sa tawo o national identification system nga maghatag ug kamatuoran sa identity sa mga Pilipino ug nga residente nga mga langyaw.

Sanglit kini maoy balido nga timailhan sa identity sa usa ka tawo, pinaagi niining hiniusang ID, mahimo nga kini niyang ika-transact ug kalihukan sa gobyerno o sa pribadong sector.

Ang PhilSys dili mahimong dalhon sa ubang tawo ug makuha lamang human matibawas sa PSA ang pagpangrehistro nga gisugdan gani sa mga benepisaryo sa Department of Social Welfare and Development (DSWD).

Subay niini, matud sa PSA Bohol, nga sugdan nila ang registration samtang gikompleto pa usab ang pre-registration gamit ang mga records nga anaa sa DSWD ug dugang nga mga interview sa mga household heads, karong Nob. 25, 2020.

Niini, miaghat ang PSA ngadto sa mga household heads, kinsa gikinahanglang may personal nga pag-adto sa rehistrohan sa mga kalungsuran, nga motunong sa ilang gitagana nga oras aron dili makalangan pa sa proseso.

Kuhaan sa biometrics ug digital profiles sama sa iris scan, fingerprints ang girehistro ug matud ni Alzacaren, mahimong moabut sa 30-40 minutos ang matag usa aron matibawas ang iyang pagrehistro.

Niini, dugang niya, mahimong makaabut sa 50 ka tawo ang marehistro matag adlaw, depende usab sa kadaghanon sa registration kits nga naa sa lungsod.

Mokabat sa 293,000 ka household heads ang irehistro sa PSA alang sa nasudnong ID sa una nilang target, samtang pun-an kini sa sunod nga mga tuig hangtud nga matibawas na ug ang tanan maghupot na sa PhilSys.

Kini sanglit, matud niya, ipatuman gihapon nila ang health and safety protocols sa registration mao nga importante nga dili gyud maghuot ang mga tawo.

Matud sa ilang gilatid nga schedule, magpadayon ang pagparehistro sa mga tumbok nga lugar nga gitagana alang niini sugod sa alas 7 sa buntag ngadto sa alas 6:30 sa hapon, Lunes hangtud sa adlaw nga Sabado ug mopahuway lamang sa Domingo. (PIA)