Sinulat ni Elvira Bongosia
Siguradong gukdon usab ni Presidente Rodrigo Duterte, pinaagi sa bag-ong gitukod nga ‘expanded task force’ ang mga gitawag nga ghost importers isip parte sa gihingosgang gubat batok sa “systemic corruption” sa gobyerno ilabi na sa Bureau of Customs (BOC), sumala pa sa taho sa Philippine Information Agency (PIA) nga gipagawas niadtong Nobyembre 10, 2020.
Kini ang giingon ni Senador Christopher “Bong” Go taliwala sa di mahuman nga isyu sa korapsyon ug iregularidad didto sa BOC.
“Huwag kayong mag-alala, darating din ang Pangulo dyan. Meron na tayong expanded task force na handa mag-imbestiga, mag-prosecute, mag-rekomenda ng suspensions, mag-lifestyle check, mag-audit at ipakulong ang mga mapatunayang nagkasala,” (ayaw lang mo ug kabalaka, moabut ra gihapon ang Presidente diha. Aduna na kitay expanded task force nga andam mag-imbestigar, maglutos ug magrekomendar sa pagsuspendir, mag lifestyle check, mag-audit ug magpabilanggo sa mga mapamatud-ang nakasala), matud pa ni Go.
Nipasidaan pa si Go nga kon gikinahanglan, basahon ni Presidente Duterte ang mga pangalan aron silotan ug mapasakaan ug kaso ug mahibaw-an sa publiko ang mga kabuang niining mga tawhana.
Naghisgot usab ang senador nga nasumiter na kang Presidente Duterte ang pangalan sa mga nalambigit sa korapsiyon sa BOC.
Kahinumdoman nga ning bag-o lang, girekomendar sa National Bureau of Investigation (NBI) ang pagsang-at ug kasong kriminal ug administratibo batok sa mga opisyal sa BOC nga nalambigit sa mga giingong mga anomaliya aron mapasakaan ug kaso sa paglapas sa Anti-Graft and Corrupt Practices Act.
Ang maong mga opisyal gikatahong nalambigit sa akreditasyon sa dili moubos sa unom ka ghost importers.
Samtang gipahayag ni Go ang pasalig sa administrasyon nga maghatod ug ‘corruption-free government services’ pinaagi sa mas gitarung nga proseso sa pagnegosyo sa nasud.
Matud pa ni Go nga adunay balaod nga Ease of Doing Business nga ang tumong niini mao nga mapadali ang proseso sa paagi nga walay korapsyon.