Sinulat ni Rey Anthony Chiu
Alang sa mga ahensya sa kagamhanan nga naa sa mga lugar nga gideklara nga ubos sa General Community Quarantine (GCQ) ug Modified General Community Quarantine (MGCQ), mahimo pa gihapon sila nga mosagop sa upat-ka-adlaw nga trabaho-an basta lang mapasunod ang 40 ka oras nga gitrabaho-an sa usa ka semana.
Kadto usab nga mga empleyado nga ubos pa sa 21 anyos panuigon ug kadtong nag-edad ug 60 pataas, kadtong dunay nga sakit nga gihambin, kadtong napahinay ang resistensya, mga buntis nga nanimuyo sa mga lugar nga gideklara nga ilawom pa sa enhanced community quarantine (ECQ), modified ECQ (MECQ), GCQ, ug MGCQ mahimong mopili sa alternative work arrangements (AWA), gawas lamang kon ang ilang serbisyo, dili ikapiyal sa lain.
Hinuon, kinahanglan sila nga moduso sa medical certificate ug uban pang magamit nga dokumento alang sa mga empleyado nga may immunodeficiency, comorbidity, o ubang kondisyones sa lawas nga magpataas sa ilang risgo nga matakdan, kon sila manghangyo sa AWA.
Kini samtang ang Civil Service Commission (CSC) nagpa-bag-o sa mga guidelines sa AWA sa goberno aron matugma kini sa mga balaod sa community quarantine nga gipagawas sa Inter-Agency Task Force on the Management of Emerging Infectious Diseases (IATF-MEID).
Ubos sa CSC Resolution No. 2000912 nga gipagawas niadtong Okt. 14, 2020 isip CSC Memorandum Circular No. 18, s. 2020, ang mga ahensya nga naa sa mga lugar nga ubos pa sa ECQ ug MECQ mosagop sa work-from-home arrangement, ug magbilin lamang ug skeletal workforce gawas kon may lahi nga palisiya sa pagpadagan sa serbisyo nga gipagawas ang usa ka ahensya.
Ubos usab sa nahisgutan nga CSC MC, ang kanhi-ay nga nailhang “staggered working hours” usbon na ngadto sa “work shifting/flexible (staggered) working hours” nga nagpasabut sa pagsagop sa flexible reporting hours isip paagi sa pagpakunhod sa kadaghanon sa empleyado sulod sa trabahoan sa usa ka higayon.
Kining work shifting o flexible working hours, mahimong sagopon sa tanan bisan kon unsa nga matang sa community quarantine ang gipatuman sa lugar diin ang ahensya nahimutang.
Sa mga trabahante nga natumbok nga kuyaw kay dali matakdan sa sakit, lakip ang mga nagpasoso nga inahan ug mga may kabilinggan kang kinsang serbisyo, dili ikatugyan sa lain, katungod sa hepe sa ahensya ang pagpakigsabut sa empleyado sa oras sa ilang pagreport sa trabahoan.
Sa hisgutanan usa sa performance sa trabaho samtang naa sa balay, matud sa CSC nga mahimo ang ahensya nga mosagop sa performance standards aron makagiya kanila sa pagkwenta sa trabaho nga nahuman.