TAGBILARAN CITY, Bohol, Nov. 18 (PIA) –- Pagkaon nga ikasapal-sapal sa mga adlaw nga naglisud og pangitag kabuhi-an dala sa mga pagpugong sa paglakaw-lakaw aron kapugngan ang pagkatag sa coronavirus disease (COVID), kini ang nadawat sa 204 ka mga banay sa Canlaas, Antequera, Bohol Nobyembre 17.
Hinuon, ang tag 5 ka kilo nga bugas ug tagurha ka delata nga beefloaf ug sardinas nga nadawat sa mga taga didto isip benepisaryo sa Food for Work Program sa Kapitolyo, gitrabaho-an og bali og duha ka oras, segun pa ni Punong Barangay Henry Ajero, sa Canlaas.
“Sila ang atong gigamit nga mga motrabaho sa pag-andam sa atong lugar nga gitapokan niining Dagyawan sa Barangay, pagpabarug sa mga dagkong tents nga kapasilongan, pagbongay aron malimyo ang grounds ug paghipos sa mga sagbut human sa kalihukan,” pasabut ni Kapitan Ajero.
Ang kapitan, kinsa nalipay tungod sa pagbisita sa mga ahensya sa goberno sa iyang barangay aron pagtanyag sa mga libre nga frontline services, nagpadayag sa iyang mga pasalamat ilabi na ngadto sa Department of Interior and Local Government ug sa Lalawigan sa Bohol nga nagtambayayong aron mapasiugdahan ang Dagyawan Sa barangay nga nahimong showcase sa tinabangay sa local nga mga kagamhanan, komunidad ug mga nasudnong ahensya.
Gawas sa Food For Work program nga gitanyag sa lalawigan sa Bohol, nanghatag usab ang Department of Social Welfare and Development sa ilang kinahon na nga relief goods alang sa mga katawhan sa Canlaas, mga pito ka kilometros gikan sa sentro sa Antequera.
Barangay nga giila nga Wicker Basket Capital sa Bohol, ang Canlaas, diin nahimutang sa mga pungkay sa mga kabukiran sa lungsod, usa ka hilit nga lugar nga nahimutang sa mga utlanan sa lungsod sa Loon, Calape ug Antequera.
Tungod sa iyang kahilit, daghang mga taga didto ang nahaylo kaniadto sa pag-tipo sa kalihukang walhon dala usab sa sulsol ug instigation sa mga walhon ngamigamit sa mga suliran sa barangay aron magmulo ang katawhan batok sa kagamhanan.
“Daghan kayo ang tabang nga makuha gikan sa kagamhanan, basta lang mapadayag kini, kay ang goberno andam kanunay nga motabang sa mga katawhan,” dayag ni Antequera mayor Lilioso Nunag, didto sa susamang panagtapok sa Dagyawan.
Gawas sa nga relief, may mga serbisyo nga gipantanyag nga libre, mga lawngon, mga bansaybansay samtang gidumala usab sa DILG ang institutional development workshops ug revisiting sa panglantaw, misyon ug katuyuan sa Barangay Canlaas.
Ang Dagyawan usa ka agianan nga gitumbok sa kagamhanan aron buksan ang panagsultihay sa mga komunidad ug kagamhanan, aron sa pilosopiya sa tinabangay, kahatagan og kasulbaran ang mga suliran sa katawhan nga nawani sa kaugmaran. (rahc/PIA-7/Bohol)