Ang Tawag

Ni Padre Jose “joesum” Sumampong, Jr.

—————————————————————

Solemnidad kang Cristo nga Hari, Tuig (A)

Nobiyembre 22, 2020

EBANGHELYO (Mateo 25:31-46)

³¹“Inig-anhi sa Anak sa Tawo ingon nga Hari, uban sa tanang mga anghel, molingkod siya sa iyang harianong trono, ³²ug ang tanang tawo sa kalibotan tigumon sa iyang atubangan. Unya bahinon niya sila sa duha ka pundok, sama sa usa ka magbalantay sa hayop nga maglain sa mga karnero gikan sa mga kanding: ³³ibutang niya ang mga karnero sa iyang tuo ug ang mga kanding sa iyang wala. ³⁴Unya ang Hari moingon sa mga tawo sa iyang tuo, ‘Umari kamo nga gipanalanginan sa akong Amahan ug dawata ninyo ang Gingharian nga giandam alang kaninyo sukad pa sa pagbuhat sa kalibotan. ³⁵Gigutom ako ug inyo akong gipakaon; giuhaw ako ug inyo akong gipainom; dumuduong ako ug inyo akong gidawat sa inyong mga balay; ³⁶hubo ako ug inyo akong gibistihan; nagmasakiton ako ug inyo akong gialimahan; nabilanggo ako ug inyo akong giduaw.’ ³⁷Unya motubag kaniya ang mga matarong, ‘Ginoo, kanus-a man kami makakita kanimo nga gigutom ug gipakaon ka namo, o giuhaw ug gipainom? ³⁸Kanus-a man kami makakita kanimo nga dumuduong ug midawat kami kanimo sa among mga balay, o hubo ug gibistihan ka namo? ³⁹Kanus-a man kami makakita kanimo nga nagmasakiton o gibilanggo, ug giduaw ka namo?’ ⁴⁰Unya ang Hari motubag kanila, ‘Sultihan ko kamo nga sa matag higayon nga maghimo kamo niini alang sa usa sa labing ubos niining akong mga igsoon, gihimo ninyo kini alang kanako!’ ⁴¹ “Unya moingon siya ngadto sa mga tawo sa iyang wala, ‘Pahawa kamo kanako, kamong gipanghimaraot sa Dios! Ngadto kamo sa kalayo nga walay pagka­palong nga giandam alang sa Yawa ug sa iyang mga anghel! ⁴²Gigutom ako, apan wala ako ninyo pakan-a; giuhaw ako, apan wala ako ninyo paimna; ⁴³dumuduong ako, apan wala ako ninyo dawata sa inyong mga balay; hubo ako, apan wala ako ninyo bistihi; nagmasakiton ako ug nabilanggo, apan wala ako ninyo alimahi.’ ⁴⁴Unya motubag sila kaniya, ‘Ginoo, kanus-a man kami makakita kanimo nga gigutom, o giuhaw, o usa ka dumuduong, o hubo, o nagmasakiton, o nabilanggo, ug wala kami motabang kanimo?’ ⁴⁵Ang Hari motubag kanila, ‘Sultihan ko kamo nga sa matag higayon nga nagdumili kamo pagtabang sa usa niining labing ubos, nagdumili kamo sa pagtabang kanako.’ ⁴⁶Busa kini sila ipadala ngadto sa walay kataposang silot; apan ang mga matarong moadto sa kinabuhing dayon.”

oOo

KAHULOGAN SA EBANGHELYO (Mateo 25:31-46)

³¹“Inig-anhi sa Anak sa Tawo ingon nga Hari, uban sa tanang mga anghel, molingkod siya sa iyang harianong trono…

Si Jesus nga nagsugod sa iyang pagpaila sa kaugalingon nga “anak sa panday”, karon mipaila na kon kinsa gayod siya: nga siya Hari. Iyang gigamit ang titulo nga “Anak sa tawo” (mabasa sa Mt 24:3, 27, 30, 37, 39, 44) nga sa mga sinulat sa mga Hudeyo mao ang misteryosong tawo nga gikan sa langit nga maoy bantugang maghuhukom sa katapusang panahon.

³²ug ang tanang tawo sa kalibotan tigu­mon sa iyang atubangan. Unya bahinon niya sila sa duha ka pundok, sama sa usa ka magbalantay sa hayop nga maglain sa mga karnero gikan sa mga kanding…

“Tanang tawo sa kalibotan”! Apil usab ako. Maanaa ang akong mga minahal, mga higala, mga kaila. Tanang matang sa mga tawo, mga mituo ug wala motuo, mga Kristyanos ug mga dili Kristyanos. Ang tanan moatubang sa Hari (basaha sa Ezekiel 34).

³⁴Unya ang Hari moingon sa mga tawo sa iyang tuo, ‘Umari kamo nga gipanalanginan sa akong Amahan ug dawata ninyo ang Gingharian nga giandam alang kaninyo …

Si Jesus nasayod gayod sa laraw sa Dios alang sa tawo: nga usa ka adlaw ang tawo mopuyo sa gingharian sa Dios.

³⁵Gigutom ako ug inyo akong gipakaon; giuhaw ako ug inyo akong gipainom; dumuduong ako ug inyo akong gidawat sa inyong mga balay; ³⁶hubo ako ug inyo akong gibistihan; nagmasakiton ako ug inyo akong gialimahan; nabilanggo ako ug inyo akong giduaw.’

Ang sukaranan sa paghukom anaa diay sa atong paghigugma ug giunsa nato sa pagpadayag kining maong gugma: diha lamang sa kayano sa atong mga gihimo alang sa uban.

³⁷Unya motubag kaniya ang mga matarong, ‘Ginoo, kanus-­a man kami makakita kanimo nga gigu­torn ug gipakaon ka namo, o giuhaw ug gipainom? ³⁸Kanus-a man kami maka­kita kanimo nga dumuduong ug rnidawat kami kanimo sa among mga balay, o hubo ug gibistihan ka namo? ³⁹Kanus-a man kami makakita kanimo nga nagmasa­kiton o gibilanggo, ug giduaw ka namo?’

Dili diay nato hulaton nga moabot pa ang panahon sa paghukom. Ang tinuod mao nga unsay atong gihimo karon — sa inadlaw-adlaw nga pagbuhat nga nakatabang sa uban labi na sa nanginahanglan — mao diay ang sukaranan sa paghukom sa matag usa kanato. Ang kinabuhing walay katapusan nagsugod sa atong panahon karon!

⁴⁰Unya ang Hari motubag kanila, ‘Sultihan ko kamo nga sa matag higayon nga maghimo karno niini alang sa usa sa labing ubos niining akong mga igsoon, gihimo ninyo kini alang kanako!’

Si Jesus anaa diay nagtago o nagtakuban sa matag tawo. Mao nga ang iyang presensya wala gayoy pagkahanaw. Sa tanang panahon anaa siya nakig-uban kanato.

41 “Unya moingon siya ngadto sa mga tawo sa iyang wala, ‘Pahawa kamo kanako, kamong gipanghimaraot sa Dios! Ngadto kamo sa kalayo nga walay pagkapalong nga giandam alang sa Yawa ug sa iyang mga anghel!

Usa ka dili malalis nga kamatuoran. Ang pagdumili sa paghigugma maoy usa ka pagdumili sa pag-abot sa Dios sa atong kinabuhi. Dili nato gayod kalimtan nga ang langit giandam alang sa “tawo”, apan ang impyerno giandam alang sa “Yawa ug sa iyang mga anghel”. Ang doktrina mahitungod sa impyerno dili inbensyon sa Simbahan, kondili gitudlo gayod ni Jesus. Ug kini alang niadtong nagdumili sa paghigugma ug pagtabang.

⁴²Gigutom ako, apan wala ako ninyo pakan-a; giuhaw ako, apan wala ako ninyo paimna; ⁴³dumuduong ako, apan wala ako ninyo dawata sa inyong mga balay; hubo ako, apan wala ako ninyo bistihi; nagmasakiton ako ug nabilanggo, apan wala ako ninyo alimahi.’ ⁴⁴Unya rnotubag sila kaniya, ‘Ginoo, kanus-a man kami makakita kanimo nga gigutom, o giuhaw, o usa ka dumuduong, o hubo, o nagmasakiton, o nabilanggo, ug wala kami motabang kanimo?’ ⁴⁵Ang Hari motubag kanila, ‘Sultihan ko kamo nga sa matag higayon nga nagdumili kamo pagtabang sa usa niining labing ubos, nagdumili kamo sa pagtabang kanako.’ ⁴⁶Busa kini sila ipadala ngadto sa walay kataposang silot; apan ang mga matarong moadto sa kinabuhing dayon.”

Ang duha ka hulagway sa panahon sa paghukom susama ug may kalainan. Susama tungod sa sukaranan niini: nga mao ang tinuoray nga paghigugma. Ang dakong panaglahi mao: adunay mga nagbuhat subay sa maong gugma ug aduna usay nagdumili sa pagbuhat sa hagit sa gugma. Ang kalainan diay anaa diha sa unsay atong nabuhat o unsay wala nato buhata nga angay buhaton.

Dili pa diay igo ang pag-ampo, ang paghimog mga debosyon. Kinahanglan diay ang pagbuhat. Dili lamang nga kita milikay sa dautan kondili nga kita mibuhat gayod sa maayo! Anaa ra kanato kon unsay atong pilion.