Gikan sa PIA
Magpakatag ang Bohol ug mga anti-corona virus disease (COVID) marshals, kinsa maoy manakop sa mga Bol-anon nga makasupak sa lagda sa pagsul-ob ug face mask, pagpanghunaw ug pagpa-layo sa mga tawo nga ika-estorya o social distancing.
Kini maoy gibutyag ni Gob. Arthur Yap didto sa iyang unang pagtambong sa Dagyawan sa Barangay nga gipasiugdahan sa Department of the Interior and Local Government (DILG) didto sa Canlaas, mga 7 ka kilometros sa pungkay sa mga kabukiran, gikan sa sentro sa lungsod.
Ang gobernador, kinsa bag-o lamang mipagawas sa Executive Order 52 nga mag-inat sa Modified General Community Quarantine (MGCQ) sa Bohol.
Matud sa gobernador na kinahanglan nga inanay pagkabuksan ang mga patigayon aron motuyok na pagusab ang ekonomiya sa lalawigan.
“Kon walay trabaho, walay kwarta ug dili makakaon ang mga tawo, ug dili na kayahon sa gobyerno ang pagpanghatag ug hinabang,” saysay sa gobernador atubangan sa mga gibanabana nga 300 ka mga tawo nga taga Canlaas ug mga representante sa mga ahensya nga misalmot sa Serbisyo Caravan sa Dagyawan.
“Gusto na kita nga magbukas na sa ekonomiya, aron inyo na usab nga mabuhat ang angayan ninyong buhaton agi ug tampo sa pagsumpo sa COVID,” dugang niya.
Nunot niini, giaghat sa gobernador ang mga mingtambong didto sa pagtabang sa pagbuyag, pagpikpik ug pagpahinumdom sa mga tawo nga ilang hingkit-an nga makasupak sa mandu sa paglikay sa pagtakod sa COVID.
“Kung wala magsul-ob ug mask, pahinumdumi, hangyoa kay kini alang sa atong kaugalingon nga panalipod lamang usab,” pasabut sa gobernador.
Ang gobernador kinsa matinud-anon nga mitug-an nga wala pa niya makita ang tumoy niining atong pag-antus sa hulga sa COVID, nanghangyo sa katawhan sa pag-ingon: “Magtinabangay kita, aron atong hiusahan ang pagbatok niining sakit.”
Hinuon, naneguro siya nga anaa lamang siya sa luwas nga distansya sa labing duol nga tawo nga iyang gikaatubang.