CSC nagpagawas ug memo kalabot sa ‘absences’ sa mga kawani sa gobyerno tungod sa COVID-19 

Sinulat ni Elvira Bongosia

Nagpagawas ug memorandum ang Civil Service Commission (CSC) kalabot sa ‘absences’ sa mga opisyal ug empleyado sa gobyerno sa panahon sa community quarantine tungod sa coronavirus disease 2019 (COVID-19).

Base sa Memorandum Circular No. 23, s. 2020 nga gipetsahan ug Nobyembre 16, 2020, tanang absences sa mga opisyal ug empleyado sa gobyerno sa panahon sa community quarantine angay ikonsiderar nga “excused absences” o kuhaon sa ilang vacation o sick leave credits.

Nakalatid sa guidelines nga sa mga na-stranded sa abroad o bisan sa ubang dapit sa nasod tungod sa suspension sa tanang matang sa transportasyon samtang naa sa official travel o aprubadong personal travel ubos sa ilang vacation o sick leave, angay ikonsiderar nga excused absences.

Apan ang mga naa sa personal travel, angay magpakita sa ilang ‘proof of intention’ nga mobalik sa ilang trabaho sama sa plane, bus o boat ticket ug cancellation sa ilang travel tungod sa lockdown o localized declaration sa enhanced, modified enhanced ug general community quarantines.

Matud pa nga apil lang sa excused absences ang panahon sa ilang pagbalik sa trabaho ug sa panahon sa ECQ, MECQ ug GCQ.

Gidugang pa sa memo nga ikonsiderar nga excused absences ang wala pag-report sa trabaho tungod sa peligro sa panglawas o ‘health risk’ apan kwalipikado alang sa work-from-home arrangement; dili makatrabaho tungod sa lockdowns; dili makatrabaho tungod sa suspension sa mga pampublikong transportasyon ug walay shuttle bus; ug mga trabahong dili mahimong buhaton pinaagi sa work-from-home scheme.

Nakalatid usab sa maong circular nga sa mga kaso sa mga empleyadong nakuha na ang leave credits, mahimo kining ibalik.

Apan ang pagkapakyas sa pag-report sa trabaho, human ang approved personal leave of absence nga walay mapakitang kamatuoran, human mipaubos sa gikinahanglang quarantine, ug wala pa gihapon maka-report bisan sa gihatag nga ‘support mechanism’ sama sa transportasyon ug housing quarters, kuhaon sa ilang vacation o sick leave credits.

Samtang tanang empleyadong nag-absent without approved leave sa wala pa ang Marso 16, 2020 nga lockdown hangtod sa ideklarar ang community quarantine, ikonsiderar pa gihapong AWOL sa tibuok panahon nga wala sila nagpakita ug intensyong mobalik sa trabaho.