Sinulat ni Rey Anthony H. Chiu
Mahimo nga may limitado nga face to face o klase nga pisikal o mag-atubang ang mga anaa sa Higher Educational Institutions (HEIs) sama sa kolehiyo ug unibersidad, apan kinahanglang kini ikonsulta una sa mga local nga kagamhanan, nahasubay sa tamdanan nga gipagawas sa Commission on Higher Education (CHED) ug estriktong pagpatamud sa health ug safety protocols.
Sa laing bahin, alang sa Kindergarten ngadto sa High School, ang Basic Education Learning Continuity Plan gikan sa Department of Education (DEPED) ang masunod, nga nagpasabut nga wala pay pisikal nga pag-tungha, samtang ang Bohol padayon pa nga ubos sa Modified General Community Quarantine (MGCQ).
Kini gitaho samtang sa makausa pa, giuswag na usab ang pag paubos sa MGCQ sa probinsya sa Bohol hangtud sa katapusang adlaw sa Enero 2021, apan gilibkas na ang gipataban nga lukop nga curfew sa Bohol nga magsugod sa alas 9:00 ngadto sa alas 5:00 sa sayo nga buntag.
Sa bag-ohay lamang nga gipagawas nga Executive Order No. 52, nga gilagdaan ni Gob. Arthur Yap niadtong Nobyembre 13, 2020, gipauswag niini ang epekto sa Executive Order No 33 nga mao usab ang naglatid sa mga sumbahan nga sundon samtang ang Bohol una nga gipailawom sa MGCQ.
Dili na usab ipatuman ang estrikto nga partial liquor ban ubos sa Executive Order No. 17, ug pasagdan na lamang ang namaligya niini kon tan-aw nila, nahasubay pa ba sa lagda sa Department of Trade and Industry, Department of Tourism ug sa Inter Agency Task Force, matud sa bag-ong EO.
Hinuon, ang pagpagawas sa mga katawhan samtang ang Bohol anaa pa sa MGCQ limitado pa gihapon ug kini tungod lamang sa pagpamalit sa mga pagkaon, aron motungha sa mga buhatan ug trabaho-an nga gipabuksan na.
Kini nagpasabut lamang nga kadtong ubos sa 15 anyos ug sobra sa 65 anyos ang mga panuigon ang dili libre nga makagawas-gawas, gawas lamang sa ilang mga eskedyul, Biyernes ug Sabado sa mga menor de edad, samtang Martes, Miyerkoles ug Huwebes sa mga sobra 65 ka tuig ang panuigon.
Bisan pa niini, kadtong mga adunay sakit nga daan nang gihambin, kadtong kang kinsa nga mga panglawas talandugon na ug kadtong mga nagsabak, dili pa gihapon tugotan nga makagawas-gawas, sumala sa nahisgutang EO.
Dugang usab niini, ang tanan mga pagpanagtapok ug kalihokan nga relihiyoso tugotan na basta katunga lamang sa gidaghanon sa popyulasyon sa tibuok lugar ang mahimong mutambong.
Gitugotan na usab ang indoor ug outdoor nga mga pagpasingot, nga dili kadtong contact sports, basta lamang mapatuman pa gihapon ang minimum nga health safety protocols ug dili mag-huwamanay ug gamit.