Kapin sa P600,000 nga kantidad sa gituohang shabu ang nasakmit sa kapulisan human sa buy bust operation nga gipahigayon sa mga tinugyanan sa Provincial Drug Enforcement Team/ Provincial Intelligence Unit (PDET/PIU) nga nagbase sa Kampo Dagohoy.
Ang gipahigayon nga buy bust nahitabo niadtong adlaw nga Martes, Nob. 17, 2020, matud sa taho nga nahipos sa The Bohol Tribune.
Nasikop sa kapulisan nga gikan sa Camp Dagohoy nga inabagan sa mga operatiba sa Philippine Drug Enforcement Agency (PDEA) ang duha ka mga gikatahapan nga giila sa pangalang sila si Mohammar Tomawis, 30, taga barangay Taloto ug John Fenyl Millan, 20, ug taga barangay Dao.
Nakuha sa duha ka gikatahapan ang gituohang shabu nga adunay timbang nga 100 gramos ug adunay kantidad nga P680,000.
Sa pagkakaron, ang duha ka gikatahapan nag-atubang ug sumbong nga kalapasan sa Dangerous Drugs Act of 2002.