Ni Padre Jose “joesum” Sumampong, Jr.
—————————————————————
Unang Domingo sa Adbiyento (B)
Nobiyembre 29, 2020
EBANGHELYO (Markos 13: 33 – 37)
Si Jesus miingon sa iyang mga tinun-an: 33 “Busa pagbantay ug pagtukaw kamo, kay wala kamo masayod kanus-a kini moabot. 34Sama kini sa usa ka agalon nga mopanaw sa layong dapit. Sa dili pa siya mogikan hatagan niyag buluhaton ang tagsa-tagsa ka sulugoon, ug pahimangnoan ang guwardiya sa pultahan sa pagbantay kanunay. 35Busa pagtukaw kamo, kay wala ninyo hibaloi kanus-a ang agalon mopauli — sa hapon ba, sa tungang gabii ba, o sa dili pa ang kaadlawon, kon sa buntag ba. 36Kon mokalit siya pag-abot, kinahanglan nga dili kamo niya hikaplagan nga mangatulog! 37Ang gisulti ko kaninyo, gisulti ko usab sa tanan. Busa pagbantay kamo!” Ang Ebanghelyo sa Ginoo.
oOo
KAHULOGAN SA EBANGHELYO (Markos 13: 33 – 37)
33a “Busa pagbantay ug pagtukaw kamo…
Ang pulong nga pagtukaw gilitok ni Jesus sulod sa upat ka higayon niining maong Ebanghelyo. Iya usab kining gilitok ngadto sa iyang mga tinun-an didto sa Gethsemani. Ang pulong usab nga pagbantay gigamit ni Jesus sa konteksto sa panagtigi o combat. Walay panagtigi kon walay pag-atubang sa kaaway. Niining pakigharong sa kaaway gikinahanglan ang pagbantay. Gigamit kining maong pulong sa makadaghan ni Jesus (Basaha sa Mk 4:12; Mk 8:15; Mk 12:38; Mk 13:5, ug Mk 13:23).
33bkay wala kamo masayod kanus-a kini moabot.
Nangutana ang mga tinun-an kon anus-a kini mahitabo ug unsay mga timaan niini (Mk 13:4), apan si Jesus wala motubag sa pangutana.
Sulod sa tanang panahon, daghan ang misulay sa pagtagna kon anus-a mahitabo ang katapusan sa kalibutan. Si Jesus mipadayag nga “wala kamo masayod kanus-a kini moabot.” Niining paagiha, kita, inay nga magsigi na lang hunahuna kon anus-a kini moabot, motutok hinoon sa atong panahon karon aron pinaagi sa atong matag adlaw nga buluhaton giubanan nato kini sa tumang pagpangandam sa unsa unyay mahitabo.
34aSama kini sa usa ka agalon nga mopanaw sa layong dapit. Sa dili pa siya mogikan hatagan niyag buluhaton ang tagsatagsa ka sulugoon…
Kabubut-on sa Dios nga kita adunay kaakohan. Mao nga gibinlan kita niya og mga buluhaton. Mahinungdanon kaayo ang pagtuman niini. Sa unsang matang sa atong pagtuman niini anaa magsandig ang atong kinabuhi.
34bug pahimangnoan ang guwardiya sa pultahan sa pagbantay kanunay.
Labi na sa panahon sa kagabihon, ang guwardiya kinahanglanon aron walay dautang mga tawo nga makasulod sa panimalay.
Hinumduman nato ang tahas ni San Pedro nga giisip nga usa ka “magba-lantay sa pultahan”. Kini nagpasabot lamang nga gitawag labi na ang mga magbalantay sa Simbahan sa pagka-mabinantayon sa mga panon nga gipiyal kanila. Mao kini ang tahas labi na sa Santo Papa ug mga Obispo. Sila ang magbalantay sa Simbahan.
35a Busa pagtukaw kamo, kay wala ninyo hibaloi kanus-a ang agalon mopauli…
Si Jesus nagpasidaan kanato sa iyang sunod nga pagbalik. Kitang tanan nag-lawig padulong sa maong panahon.
Tinuod gayod nga moabot ang panahon nga atong ikahibalag si Jesus sa linawas (I Corinto 13:12). Ang tibuok kinabuhi sa usa ka Kristyano mao ang paglantaw nianang panahona.
35b sa hapon ba, sa tungang gabii ba, o sa dili pa ang kaadlawon, kon sa buntag ba.
Si Jesus mipasidaan nga ang iyang pag-abot mahitabo usab sa kagabihon. Ug nasayod kita nga ang mga katawhan niadtong panahona naglikay sa paglakaw sa kagabihon tungod sa kangitngit. Adunay dakong kalisang nga tingali may dautang mahitabo sa dalan. Adunay espesyal nga mensahe kini: nga ang kangitngit mao ang timaan sa panahon sa pagsulay. Mao nga sa maong mga higayon kita mas magbantay ug magtukaw.
Kahinumduman kita usab nga si San Pedro midumili sa pag-angkon ni Jesus sa panahon sa kangitngit, tingali sa kaadlawon, sa panahon sa pagtuktugaok sa manok.
Sama kang Pedro kon dili kita magbantay ug magtukaw, anaay dakong purohan nga kita usab masayop, mahisukamod, mapukan ngadto sa kadautan.
36aKon mokalit siya pag-abot…
Ang pag-abot sa Dios mahitabo sa panahon nga wala nato damha. Wala nato palandonga. Wala nato paabota!
Kabahin kini sa pagka-misteryoso sa Dios nga dili gayod kita sa hingpit masayod kabahin kaniya.
36bkinahanglan nga dili kamo niya hikaplagan nga mangatulog!
Sa mga butang nga kalagnon o espirituhanon, usahay matintal kita sa kalaay o kakapoy. Mao nga gipasidan-an kita nga dili gayod magpadaog sa atong mga kaluya ug kataspok. Hinoon sagupon nato ang pagka-aktibo ug pagkamadasigon sa pagbuhat sa mga butang nga angay ipakita ngadto sa atong Dios.
37Ang gisulti ko kaninyo, gisulti ko usab sa tanan. Busa pagbantay kamo!”
Sa hunahuna sa Dios, ang iyang balaanong presensya anaa na diha sa matag panghitabo ug kasinatian sa pagkinabuhi sa matag tawo. Ang Dios anaa sulod sa kasingkasing kanatong mga tawo. Mao nga ato untang mamatikdan ang pagka-anaa sa Dios diha kanato!