Tungod kay apektado gihapon ang industriya sa baboy didto sa Luzon tungod sa sakit sa mananap nga gitawag nga Affrican Swine Fever (ASF) ug tungod niini mahal kaayo ang farm gate prices sa karne sa baboy didto, adunay laraw ang mga tinugyanan nga ang Bohol mosulod sa merkado sa
Luzon ug mamaligya ug karneng baboy sa maong dapit sa nasud.
Natan-awan nga labing kinahanglan sa Luzon ang karneng baboy tungod nagsingabot na usab ang Pasko.
Bago-hay pa nga nagtigom ang ASF Provincial Execurive Council didto sa Kapitolyo ug gibityag ni Provincial Veterinarian Stella Marie Lapiz nga dinhi sa probinsya ang presyo sa mga buhing baboy gikan sa P100 ngadto sa P115 kada kilo, didto sa Luzon mokabat ang presyo gikan sa P200 ngadto sa P230 kada kilo ang presyo sa buhing baboy.
Kon ang presyo sa naihaw nga karneng baboy gikan sa P170 ngadto P 197 kada kilo, didto sa Luzon ang presyo sa karne sa baboy gikan sa P340 ngadto sa P360.
Ang kamahal sa presyo sa karneng baboy didto sa Luzon gumikan kay napugos ang mga nagbuhi ug baboy didto na ihawon ug ilabay ang mga baboy nga natakdan sa sakit nga ASF. Gihimo kini aron mapugnan ang mas dakong kadaot sa industriya sa pagbuhi ug baboy didto sa Luzon nga gibana-bana nga mokabat sa pipila ka bilyong piso ang kantidad niini.
Ang ASF usa ka kusog nga makatakod nga sakit nga maapektohan ang domesticated ug wild nga matang sa baboy.
Hinoon, walay kakuyaw ang gidala ang maong sakit sa tawo, adunay purohan nga mahurot kamatay ang mga baboy kon walay himoon aron mapugnan ang pagkuyanap sa maong sakit.
Unang nahibaw-an ang pagtakboy sa maong sakit sa mga ginagmay nga mga farms didto sa Luzon niadtong Sept. 2019, mikuyanap ang ASF sa labing daghang dapit sa Luzon.
Tungod sa mga pagpugong o mga paagi, napugnan ang pagkuyanap sa maong sakit sa mga dapit sa kabisayan ilabi na dinhi sa Bohol.
Niadtong Peb. 2020, gikataho nga adunay mga baboy nga natakbuyan sa maong sakit didto sa Mindanao.
Dinhi sa Bohol, ang provincial ASF Executive Council sa pakigalayon sa mga dagkong patigayon nga nagbuhi ug baboy mipahiluna ug mga biosecurity measures aron mapugnan ang pagkuyanap sa maong sakit sa mga baboy.
Nunot niini, gidili usab ang pagdala dinhi ug mga pagkaon nga gikan sa baboy, mga processed pork meat, buhing baboy ug lawog sa baboy.
Gidungangan pa sa Coronavirus disease, diin adunay mga travel restrictions, misamot kamahal ang gibaligya nga baboy didto sa Luzon.
Kon abli pa anf turismo dinhi sa Bohol, dali ra na hurot ang suplay sa karneng baboy sa Bohol.
Tungod sa pagkunhod sa demand sa baboy dinhi kay wala nagoperate ang turismo, ug gidili ang mga pyesta, ug mikunhod usab ang katakus sa mga katawhan nga mopalit o gitawag nga purchasing power, sayon ra unta mahalin ang baboy dinhi.
Wala na usab nagbuhi ang mga ginagmay nga nagbuhi ug baboy kay alkanse sila sa gasto sa lawog palang daan.
Makatabang ug dako kon ugaling makabaligya ang mga taga Bohol sa karneng baboy ngadto sa Luzon aron makabawi sa alkansi.
Aron makatabang, maghimo ug mga sumbanan ang konseho aron mahimo ang pagbyahe sa mga karneng baboy pagawas sa probinsya ngadto na sa Luzon.