Gikan sa PiA
Alang sa mga pasahero nga mosakay sa mga barko paingon sa bisan hain nga pantalan sa Bohol, gawas sa iyang gihuptan nga ticket, kinahanglan nga makapakita sa mga dokumento nga gikinahanglan aron pagmatuod sa iyang pagkatawo ug tumong sa pagtabok sa Bohol.
Kini maoy unod sa section 4 sa Executive Order No. 54 nga gipagawas ni Gobernador Arthur Yap aron hiusahon ug pasayonon ang mga sumbanan sa pagbyahe sa mga locally stranded individuals, nanguli nga mga Overseas Filipino Workers ug mosulod nga mga Authorized Persons Outside Residence.
Niini, pugos siya nga pangayu-an sa Travel Authority gikan sa Philippine National Police Joint Task Force COVID Shield, ug Letter of Confirmation gikan sa local nga kagamhanan nga iyang gigikanan o adto-an sa Bohol, kon mapakyas siya pagpakita niini, dili siya makasakay sa barko.
Didto usab sa iyang pag check-in, kinahanglan siya nga kuhaan sa temperature gamit ang non-contact nga himan, aron masuta kon may hilanat, sip-on, ubo, pagluya sa lawas ug paglisud sa pagginhawa, ug kon mapamatud-an nga nia siya niini, hikawan na siya sa pagluwan sa barko.
Gikinahanglan usab ang pasahero nga mo-fill-up sa Passenger Personal Detail Form ug kini kuhaon sa mga tripolante sa barko ug itugyan sa Department of Health alang sa mas sayon nga contact tracing.
Kinahanglan usab sila nga nagdumala sa barko sa pagbutang sa mga footbath nga may pamatay kagaw aron tumban sa matag pasahero sa dili pa motikang sa damyo, ug ipahimutang usab kini ug sa pagkanaug sa pasahero.
Obligasyon usab sa barko ang pagbutang ug mga hunawanan, hand sanitizers ug mga pamatay kagaw o disinfectants nga magamit sa matag pasaheo sa bisan unsang higayon sa byahe.
Sa sulod sa barkoang tanang tripulante ug pasahero gikinahanglan nga dili gyud magtangtang sa face masks sa tanan higayon, kay dili gani pasakyon sa barko kadtong pasahero nga walay face mask.
Kay ang mga barko tugotan lamang sa pagkarga sa katunga sa iyang kapasidad, ang tanang pasahero motuman gayud sa usa ka metros nga distansya sa matag usa samtang naglawig ang barko.
Aron maseguro kini nga matuman, markahan ang mga agi-anan ug lingkoranan ug mga lugar nga mahimong magkatapok.
Kon sa higayon nga samtang naglawig ang barko, may pasahero nga makabati sa pagkalain sa lawas ug may simtomas sa sakit, i-lain dayun siya sa uban ug dalhon sa isolation area sa barko aron itugyan sa Municipal o City Health Officer sa lungsod o syudad nga dunggo-an sa barko.
Sa pag-abut na usab sa pantalan sa Bohol, walay pasahero nga tugotan nga makagawas sa pantalan kon dili kauban ang extraction team nga mokuha kaniya, o ang bahan nga gipadala sa iyang nakuha nga accommodation facilities.
Tungod niini, labing importante nga makig-alayon una ang pasahero sa lungsod nga iyang uli-an o sudlan, aron mapahimutang na nga daan ang iyang tigsugat nga sakyanan nga mao usay modala kaniya ngadto sa iyang giandam na nga quarantine facility.