Armas, bala, ug drugas ang nasakmit sa kapulisan sa duha ka mga nagkalaing mga ronda nga gihimo sa barangay Manga niining dakbayan sa Tagbilaran, matud pa sa mga taho gikan sa kapulisan.
Ang duha ka nagkalaing ronda nahitabo niadtong adlaw Miyerkules, Dis. 2, 2020, dugang nga asoy sa kapulisan.
Ang mga tinugyanan sa Criminal Investigation and Detection Group (CIDG), Provincial Mobile Force Company (PMFC), Regional Intelligence Unit 7 (RIU), Maritime Police, ug Provincial Highway Patrol Group ang mipahigayon sa ronda.
Gironda sa kapulisan ang balay sa suspetsado nga naila nga si Jan Bosco Igang, 30, taga Purok 1, barangay Manga, sa dakbayan sa Tagbilaran.
Adunay search warrant ang kapulisan nga pinirmahan ni Maghuhukom Leo Moises Lison sa Regional Trial Court branch 3 nga nagbase sa Tagbilaran City.
Nakuha sa kapulisan gikan kang Bosco ang usa ka unit nga .38 caliber revolver, duha ka buhing bala sa .38 caliber, usa ka kabhang sa buhing bala, ug tulo ka gagmay nga putos sa gituohang shabu.
Gidala ang gikatahapan sa Camp Francisco Dagohoy para sa booking procedure ug gibilanggo na sya karon sa Tagbilaran police station lock-up jail.
Sa laing bahin, usa ka laing ronda ang gipahigayon sa mga kapulisan adto ra gihapon sa barangay Manga ning dakbayan sa Tagbilaran.
Gironda sa mga pulis ang panimalay ni Hector Epe, 30, ug taga Purok 1, barangay Manga, ning dakbayan sa Tagbilaran.
Gipatuman sa kapulisan ang search warrant nga gipirmahan ni Maghuhukom Lison. Ang ronda nahitabo niadtong adlaw Miyerkules.
Nakuha sa balay ni Epe ang usa ka unit nga 9mm KG9 machine gun pistol, siyam ka buhing bala sa .9mm, ug upat ka pakete nga adunay sulod nga gituohang shabu.
Gidala ang suspek sa Camp Francisco Dagohoy alang sa booking procedure ug human niini gibilanggo ang maong gikatahapan sa selda sa estasyonan sa kapulisan sa Tagbilaran.
Moatubang ang maong suspek sa tukmang kaso nga ipasaka batok kaniya.