Sinulat ni Rey Anthony Chiu
Gikataho nga mangayo na ang usa ka Amerikano nga kompanya nga usa sa mga nag-ugmad sa bakuna batok sa Coronavirus disease (COVID) sa Emergency Use Authority (EUA) gikan sa mga tumbok nga tinugyanan aron makapagamit na sa ilang bakuna.
Gitaho nga ang biotech company nga Moderna, nangayo na EUA gikan sa U.S. Food and Drug Administration (FDA), ug sa European Medicines Agency aron katugotan na sila nga magpasugod sa pagpagamit sa ilang bakuna nga malampuson nga nakapakita nga epektibo batok sa gikaintapan nga sakit.
Matud pa sa usa pa pamahayag sa kompanya nga nagpasuway sa ilang namugna nga bakuna batok sa COVID, napulo ug usa lamang sa 30,000 ka mga gisuwayan ug tupok sa bag-ong namugna nga bakuna batok sa COVID ang mingpakita sa mga simtomas sa sakit human sa ka duha ka pagpatupok.
Kini dyutay lamang kaayo kon itandi sa 185 ka tawo nga nagpakita sa simtomas human sila dungan nga gi-expose sa kagaw sa COVID, apan dili bakuna kon dili placebo lamang ang ilang nakuha.
Ang maayong balita kabahin sa bag-ong gimugna nga bakuna, gipagawas sa kompanya dili pa dugay
Sunala sa kompanya, kini nga kalampusan naglangkob sa 94.1%, nga ka epektibo, mas taas pa kay sa gilauman sa mga siyentipikong nagtuon sa mga bakuna batok sa COVID.
Gani, dugang sa kompanya, wala sila magdahum nga moabut sa 100 porsyento ang kaepektibo sa ilang bakuna batuk sa paggrabe sa sakit.
Sa ilang tanan nga mga natupokan sa ilang bakuna, walay usa nga minggrabe, bisan pa kon may pipila ka pudyot nga may gipakita nga simtomas.
Ang bakuna sa Moderna batok sa SARS-CoV-2, ang kagaw nga kinaingnan sa COVID-19, nagasalig sa usa ka bag-ong teknolohiya nga migamit sa messenger RNA (mRNA) aron sugoon ang usa ka matang sa protina sa sulod sa lawas sa tawo nga maoy mopatay sa kagaw nga kinaingnan sa sakit.
Kini nga pamaagi ug teknolohiya gigamit usab sa Pfizer ug BioNTech ug sa ilang mga pagsuway, mingpakita kini ug maayong kalampusan.
Minghangyo na usab ang Pfizer sa usa ka EUA request alang sa ilang bakuna, ug segun pa sa dugang taho, magtigum na ang FDA ug ang ilang vaccine advisory committee aron tuki-on ang mga datus sa mga pagtuon sa sunod semana.
Niini, naglaum na ang mga tigpaniid nga sa tigum sa FDA, mga 24 ngadto sa 72 oras human niini, ikapagawas na ang EUA.
Kini usab nga mga bakuna gilauman nga unang itupok sa mga tawo nga mas may dagkong risgo nga matakdan sama sa mga health care workers, mga edaran, kadtong may mga gihambin na nga sakit, ug kadtong kang kinsang panagang sa lawas, wala na mogana.
Kasamtangan na usab nga mingpakita sa susamang mga paglampus ang mga clinical testing sa ubang mga bakuna batok sa COViD.
Kining mga bakuna naglangkob sa naugmad usab sa higanteng kompnya nga AstraZeneca, kauban ang Oxford University, ug ang sa Gamaleya Research Institute of Epidemiology and Microbiology sa Russia.