Gikan sa PIA
Sa nagsingabot nga mga holidays nga kasagaran mga kalihukan gitambongan sa daghang tawo, ug diin adunay mga pagbyahe ug paglulinghayaw, mipahimangno ang Department of Health (DOH), nga labing maayo nga likayan una kini aron ikahiklin ang kadaghanan sa kakuyaw nga hingtakdan sa sakit nga Coronavirus disease (Covid).
Matud sa DOH sa ilang Department Circular (DC) No. 2020-0355 o ang pagpaseguro sa pagtuman sa Minimum Public Health Standards alang sa Covid mitigation ilabi na sa nagsingabut nga mga holidays, maayo na nga may giya ang tanan kung unsaon nga luwas kita nga molambigit sa mga kalihukan.
Subay sa DC No. 2020-0355, aron malikayan ang mga risgo nga matakdan sa Covid 19 mahimong pagamyon pinaagi sa:
- paghatag ug gidaghanon sa tawo nga makatambong sa nga panagtapok
- paglikay sa mga kalihukan nga magpabyahe sa mga tawo
- pagpili lamang niadtong mga kalihukan nga may labing mubo nga panahon sa pagkadu-ol sa mga tawo
- pagbansay sa pagsul-ob sa face mask, pagpanghunaw, pagdistansya
- ug ang pagpakisayud sa saktong impormasyon kabahin sa Covid 19.
Mipahinumdom usab ang DC niining mosunod:
- paglikay sa paghawid sa mga butang nga perming gunitan sa tawo
- pagseguro nga adunay igong lugar diin hayahay ug makalusot lusot ang hangin
- pagseguro nga adunay saktong bentilasyon
- pagseguro sa pagpalig-on sa panglawas ug mental nga kahimsog.
Matud ni DOH Health Undersecretary ug Spokesperson Maria Rosario Singh-Vergeire, ang pagtapok ug apil sa kalihukan didto sa mga lugar nga may daghang mga tawo nga magpundok, magpahimutang gayud sa kaugalingon sa peligro.
“Kanang pagsuroysuroy sa mga lugar nga may daghang tawo, pagpakigsahug sa mga nagkadaiyang tawo ug ang pagsulod sa mga lugar nga sirado, maoy tulo sa mga labing delikado nga buhat nga nagtanyag sa taas nga posibilidad nga matakdan sa COVID19” matud pa niya.
Dugang pa sa undersecretary nga ang hulga sa pagtakod mas taas kon nia ka niining tulo ka mga gihisgutan sa itaas.
Kon hunahunaon, ang tulo ka delikado nga mga buhat sama ra gihapon sa pagtambong sa dagkong tapoktapok, pagsuroysuroy ug pagpangompra sa mga malls, ug kadtong mga party nga naa sa sulod sa mga kabalayan nga may kantahay, sinayaway ug sininggitay.
Gisugyot pagdugang ni Usec Vergierre nga kon posible, himoon na nga virtual ang mga kasaulogan sa Pasko aron walay kahigayonan nga makatabok ang kagaw.
Dugang pa, alang sa Pasko ug sa Bag-ong Tuig, gisugyot sa DOH ang eksklusibo nga panagtapok sa mga membro sa pamilya lamang, samtang virtual ang alang sa mga wala manimuyo didto.