By: FR. Jose “Joesum” Sumampong, Jr.
Ika-Tulong Domingo sa Adbiyento (B)
Disyembre 13, 2020
EBANGHELYO (Juan 1: 6 – 8, 19 – 28):
6May tawo nga ginganlag Juan nga gipadala sa Dios 7pagsaksi ngadto sa mga tawo mahitungod sa kahayag, aron ang tanan makadungog sa mensahe ug motuo. 8Si Juan dili mao ang kahayag, apan mianhi siya aron pagsaksi mahitungod sa kahayag. 9Kini ang matuod nga kahayag nga moanhi na sa kalibotan ug mag-iwag sa tanang tawo. 19Kini ang gisulti ni Juan sa diha nga ang mga kadagkoan sa mga Judio sa Jerusalem nagpadalag mga pari ug mga Levita aron pagpangutana kon kinsa siya. 20Wala magdumili si Juan pagtubag kanila; mitug-an siya sa walay lipodlipod nga dili siya mao ang Mesiyas. 21 “Kinsa ka man diay?” nangutana sila. “Si Elias ka ba?” “Dili ,“ mitubag siya. “Ikaw ba ang Propeta nga among gipaabot?” nangutana sila. “Dili,” mitubag siya. 22Ug sila miingon, “Nan, sultihi kami kon kinsa ka aron may ikatubag kami sa mga nagsugo kanamo. Unsa may ikasulti mo mahitungod sa imong kaugalingon?” 23Si Juan mitubag, “Ako mao ‘Ang tingog nga nagsinggit sa kamingawan: Hawani ang dalan nga agian sa Ginoo!’” (Kini ang gisulti ni propeta Isaias.) 24Ang mga sinugo pinadala sa mga Pariseo. 25Gipangutana na usab nila si Juan, “Kon ikaw dili mao ang Mesiyas, ni si Elias, ni ang Propeta, nganong namunyag ka man?” 26Si Juan mitubag, “Ako nagbunyag pinaagi sa tubig, apan may usa diha kaninyo nga wala ninyo hiilhi. 27Moabot siya sunod kanako, apan ako dili takos bisan gani paghubad sa higot sa iyang sandalyas.” 28Kining tanan nahitabo didto sa Betania, sa tabok sa Suba sa Jordan diin namunyag si Juan. Ang Ebanghelyo sa Ginoo.
oOo
KAHULOGAN SA EBANGHELYO (Juan 1: 6 – 8, 19 – 28):
6May tawo nga ginganlag Juan nga gipadala sa Dios
Uban kang Maria, si Juan nga Magbubunyag maoy usa ka inilang tawo sa panahon sa Adbiyento. Matag tuig ang ikaduha ug ikatulo nga Domingo sa Adbiyento kinatibuk-ang gitutok kaniya. Siya mao ang katapusan sa mga propeta sa Daang Tugon (tan-awa sa Lk 1:76, Mt 11:9). Si Juan mao ang labing una nga saksi ni Cristo. Siya mao ang taytayan tali sa Daan ug sa Bag-ong Tugon.
7pagsaksi ngadto sa mga tawo mahitungod sa kahayag, aron ang tanan makadungog sa mensahe ug motuo.
Saksi sa Kahayag! Pagkahalangdon sa maong pasidungog.
Si Juan mao ang naghatag og pagsaksi. Ang laing tulo ka mga Ebangelista—Mateo, Markos, Lukas—mipaila kaniya nga “magwawali sa pagbag-o sa kinabuhi, pagpuasa, pagbasol sa mga kasal-anan”. Apan si Juan nga Ebangelista milarawan kang Juan nga Magbubunyag nga “Saksi sa Kahayag.”
Angay natong hinumduman nga ang pulong “saksi” nga mao ang pulong “martyros” sa pinulongang Greigo. Kini matuod gayod kay siya man ang unang “martir” o gipatay gumikan kang Cristo (tan-awa sa Mk 6:27).
Mao nga sumala sa Ebanghelyo ni San Juan, ang tibuok saysay sa Ebanghelyo anaa manukad sa kamatuoran nga ang kalibutan mipahimutang kang Jesus sa pagsulay o trial. Si Jesus gisalikway, gisumbong o gipasumangilan sa sala. Mao nga may mga tawo nga mibarog aron sa paghatag og panalipod kang Cristo. Ang labing una kanila mao si Juan nga Magbunbunyag.
Sa ebanghelyo mabasa kanato ang pulong “saksi” sulod sa kap-atan (14) ka higayon, ug ang pulong “pagsaksi” gisulat sa katloag-tulo (33) sa higayon.
Andam ba ako bagbarog aron pagsaksi kon kinsa si Cristo? Labi na sa panahon nga siya gisulay?
19Kini ang gisulti ni Juan sa diha nga ang mga kadagkoan sa mga Judio sa Jerusalem nagpadalag mga pari ug mga Levita aron pagpangutana kon kinsa siya.
Kining maong tudling nakapaaghat kanato sa pag-usisa sa atong kaugalingon diha sa atong tahas sa pagka-saksi. Kay sa tinuoray ang matag binunyagan saksi man gayod ni Cristo. Nakit-an nato nga ang paagi sa pagpuyo sa kinabuhi ni Juan naghagit kon giunsa nato pagpakabuhi sa atong sitwasyon karon. Si Juan gipangutana sa iyang matuod ka pagka-kinsa siya o identity.
Kinsa man usab ako? Anaa ba kanako ang ilhanan nga ako saksi kang Cristo?
20Wala magdumili si Juan pagtubag kanila; mitug-an siya sa walay lipodlipod nga dili siya mao ang Mesiyas… 21dili siya mao ang propeta… 23Ako mao ang tingog nga nagsinggit sa kamingawan: Hawani ang dalan nga agian sa Ginoo!’”…
Nasuta nato niining maong tubag nga nagpaluyo sa pangutana kon kinsa si Juan mao usab ang pagpangutana sa mga katawhan bahin kang Cristo. Ang mga katawhan diay nangita gayod sa Manluluwas, si Cristo!
Si Juan nagtug-an nga dili siya mao ang Mesiyas. Igo na siya nga mipasabot nga siya mao ang “tingog” nga nag-andam sa Mesiyas.
Mao kini ang hagit sa atong panahon karon nga kita unta “tingog” nga mopaila kon kinsa si Cristo ngadto sa uban.
26Si Juan mitubag, “Ako nagbunyag pinaagi sa tubig, apan may usa diha kaninyo nga wala ninyo hiilhi.
Kining Cristo nga atong imantala ngadto sa uban, anaa na sa matag tawo. Anaa siya diha sa atong pakig-asdang sa atong kinabuhi, anaa sa atong mga pagpaningkamot, anaa sa atong mga paglaum. Apan tingali wala pa mailhi.
Dili nato makalimtan nga anaa si Jesus nagpahipi niadtong mga gigutom, giuhaw, nagmasakiton, nabilanggo, walay sapot, etc…
Anaa ang presensya ni Cristo nakig-uban kanato, apan usahay wala lamang kita magpakabana kaniya! O wala magpakabana ngadto kanila kansang lisod nga kahimtang anaa nagtago si Kristo.
Si Jesus nga nagtago o nagpahipi sa pagpaila sa iyang kaugalingon… andam ba ako sa pagpangita kaniya?
27Moabot siya sunod kanako, apan ako dili takos bisan gani paghubad sa higot sa iyang sandalyas.”
Kini ang dakong hinungdan ngano nga si Juan nga Magbubnuyag nahanaw sa dihang si Jesus misugod na sa iyang misyon. Mipakunhod siya sa iyang kaugalingon aron mapadako ang pagkasayod sa mga katawhan mahitungod kang Jesus, nga mao ang Mesiyas. Andam ba ako nga mahimong gamay atubangan sa mga tawo aron lamang mapadako ang presensya sa Dios?