Ni Padre Jose “joesum” Sumampong, Jr.
Ika-Upat nga Domingo sa Adbiyento (B)
Disyembre 20, 2020
EBANGHELYO (Lukas 1: 26 – 38)
26Sa ikaunom ka bulan sa pagmabdos ni Elisabet, gipadala sa Dios ang anghel nga si Gabriel ngadto sa usa ka lungsod sa Galilea nga ginganlag Nazaret. 27May mensahe siya alang sa usa ka batan-ong dalaga nga sinayoran sa usa ka lalaki nga ginganlag Jose, nga kaliwat ni Hari David. Maria ang ngalan sa babaye. 28Miadto ang anghel kaniya ug miingon, “Paglipay! Ang Ginoo nag-uban ug nagpanalangin kanimo pag-ayo!” 29Nalibog pagayo si Maria sa pagkabati niya sa mensahe sa anghel, ug nagpalandong siya kon unsay kahulogan sa iyang mga pulong. 30Miingon ang anghel kaniya, “Ayaw kahadlok, Maria, kay gikahimut-an ka sa Dios. 31Magmabdos ka ug manganak ug lalaki, ug nganlan mo siyag Jesus. 32Mahimo siyang inila ug tawgon siya nga Anak sa Dios nga Labing Halangdon. Ang Ginoong Dios maghimo kaniyang hari, sama sa iyang katigulangan nga si David, 33ug mahimo Siyang hari sa mga kaliwat ni Jacob hangtod sa kahangtoran; ug dili gayod matapos ang iyang gingharian!” 34Maria miingon sa anghel, “Ulay ako, busa unsaon man pagkahimo niini?” 35Ang anghel mitubag, “Mokunsad kanimo ang Espiritu Santo, ug magpabilin ang gahom sa Dios diha kanimo. Tungod niini, ang balaan nga bata tawgon nga Anak sa Dios. 36Hinumdomi ang imong paryenti nga si Elisabet. Giingon nga dili na Siya moanak; apan karon ika-unom na ka bulan ang iyang pagsabak, bisag tigulang na siya kaayo; 37kay walay dili mahimo sa Dios.” 38Miingon si Maria, “Sulugoon ako sa Ginoo; mahitabo unta kanako ang imong gisulti.” Ug mibiya ang anghel kaniya. Ang Ebanghelyo sa Ginoo.
oOo
KAHULOGAN SA EBANGHELYO (Lukas 1: 26 – 38):
28… gipadala sa Dios ang anghel nga si Gabriel ngadto sa usa ka lungsod sa Galilea nga ginganlag Nazaret.
Mao kini ang dakong kalainan sa pagpahibalo sa pagkatawo ni Juan nga Magbubunyag ug ni Jesus:
ni JUAN: ni JESUS:
Jerusalem… Nazaret…
Sa templo… Sa usa ka balay…
Sa pari… Sa batan-ong
babaye…
Wala mituo Mituo ug gidawat
sa mensahe… ang mensahe…
Ang Nazaret maoy usa ka dili inilang dapit. Gilangkoban lang og 150 ka mga tawo nga nagpuyo sa 20 ka balay. Gani gisaway kining lugara sa mga katawhan: “Adunay bay maayo nga magagikan sa Nazaret?” (Jn 1:46). Ang kayano sa balay ni Maria may dakong kalainan sa kabuhong sa Templo diin si Zacarias nakadawat sa mensahe. Pagkasimpli sa panghitabo nga nahilambigit sa Inkarnasyon.
27May mensahe siya alang sa usa ka batan-ong dalaga nga sinayoran sa usa ka lalaki nga ginganlag Jose, nga kaliwat ni Hari David. Maria ang ngalan sa babaye.
Duha ka ngalan nga may talagsaong kahulogan: “Yosep h’el” nga nagkahulogan og “Agad pa unta nga ang Ginoo magdugang” ug “Miryam” nga nagkahulogan og “Halangdong Babaye”.
28aMiadto ang anghel kaniya ug miingon, “Paglipay!…
Ang pulong nga Griego mao ang gigamit nga pulong sa anghel. “Kaire” o “paglipay” maoy pulong nga sagad mabasa sa bibliya (Zep 3:14; Zech 2:14, 9:9; Is 54:1). Paglipay mao kini ang unang mensahe sa Dios ngadto sa kalibutan nga gipaagi kang Maria.
28bAng Ginoo nag-uban ug nagpanalangin kanimo pag-ayo!”
Mao kini ang kasagarang paagi sa Dios nga ipamulong ngadto sa mga pinili (Genesis 15:1, Exodus 4:12, Judges 6:12, 17). Mao usab kining mga pulonga nga atong madungog nga ihimamat sa mga manimbahay gikan sa pari panahon sa Santos nga Misa. “Emmanuel” ang “Ginoo ania uban kanato”.
29Nalibog pagayo si Maria sa pagkabati niya sa mensahe sa anghel, ug nagpalandong siya kon unsay kahulogan sa iyang mga pulong.
Ang kalibog kabahin gayod sa saysay sa balaang pagpahibalo sa plano sa Dios ngadto sa kang bisan kinsa diha sa daang testamento. Anaa kining kalibog aron sa pagmatuod nga ang plano sa Dios usa ka misteryo. Dili matukib sa yanong tawo ang way kinutubang kaalam sa Dios. Kon ang tawo mahiduol sa Dios, ang iyang unang reaksyon mao ang katingala atubangan sa balaanong presensya o kalibog sa balaanong mensahe.
30Miingon ang anghel kaniya, “Ayaw kahadlok, Maria, kay gikahimut-an ka sa Dios. 31Magmabdos ka ug manganak ug lalaki, ug nganlan mo siyag Jesus.
Si Lukas migamit og mga pulong nga kasagaran mao ang gigamit sa Bibliya sa mga panghitabo nga susama niini (Gen 16:11, 17:19, Judges 13:5-7, Isaiah 7:14)
Sulod sa taas nga panahon, kining panagna ni Isaias gidawat nga mao ang pagkatawo sa Manunubos gikan sa babayeng ulay nga sa Griego “parthenos” nga sa ato pa ulay.
32Mahimo siyang inila ug tawgon siya nga Anak sa Dios nga Labing Halangdon. Ang Ginoong Dios maghimo kaniyang hari, sama sa iyang katigulangan nga si David, 33ug mahimo Siyang hari sa mga kaliwat ni Jacob hangtod sa kahangtoran; ug dili gayod matapos ang iyang gingharian!”
Gipahinumduman sa Anghel Gabriel si Maria sa panagna ni Nathan (2 Samuel 7:12-17. Isip usa ka Israelita, si Maria nakasabot niini kay kini kabahin man sa pagtuo sa matag Israelita nga nagpaabot sa Manunubos.
34Maria miingon sa anghel, “Ulay ako, busa unsaon man pagkahimo niini?”
Niadtong panahona kon ang usa ka babaye sinayoran na ngadto sa usa ka lalaki kana nagpasabot nga anaa na nila ang katungod sa pagbuhat sa mga buluhaton sa bana ug asawa, lakip na ang panagdulog. Si San Lukas mipatataw nga si Maria wala mobuhat niini tungod sa iyang tuyo nga mahimo siyang ulay alang sa Ginoo. Si Maria, sama sa pipila ka mga babaye niadtong panahona, aduna nay pagbati nga ihalad ang kinatibuk-an sa kaugalingon ngadto sa Ginoo. Ug ang paagi niini mao ang pagpili sa estadong ulay.
35aAng anghel mitubag, “Mokunsad kanimo ang Espiritu Santo, ug magpabilin ang gahom sa Dios diha kanimo.
Dili nato sabton nga natugkad ang kamatuoran sa iyang umaabot nga anak pinaagi sa iyang kaalam sa doktrina. Hinoon gihatagan siyag pag-aninaw sa kasinatian nga mao ang “Shekinah” nga daw anaa “panganod” o “anino” nga anaay gitipigan sa Dios alang kaniya.
35bTungod niini, ang balaan nga bata tawgon nga Anak sa Dios…
Bisan pa sa sinugdanan sa kinaiyang tawhanon ni Jesus diha na gayod kaniya ang Espiritu sa Ginoo. Busa si Jesus Dios gayod sukad pa sa pagsabak ni Maria kaniya.
38…“Sulugoon ako sa Ginoo; mahitabo unta kanako ang imong gisulti.” Gidawat kini ni Maria uban sa Pagtuo!