Nangandam ang kagamhanan alang sa posible nga pagsulbong sa mga kaso sa matakdan sa Coronavirus disease (COVID) human sa Pasko ug Bag-ong Tuig.
Niini, mas maayo gyud gihapon nga likayan gyud ang kahigayunan nga matakdan, kay kini makapa-awas sa mga sulod sa tambalanan ug magpakunhod sa kapasidad sa nasud sa maayong pagresponde, bahad sa Departtment of Health (DOH) ngadto sa mga dili mag-amping karong Pasko.
Kini, bisan pa man nga kanunay kining nagpahinumdom sa katawhan sa pag-amping ug pagpasul-ob sa tukmang panalipod batok sa pagtakod.
Matud sa DOH, mahimong ang pagdagsang sa mga tawo nga manggawas gikan sa mga kwarantina sa balay kay mamasko, mamalit ug gasa, manimba ug mag tambong sa mga salosalo, maoy mamahimong super-spreaders sa kagaw.
Nunot niini, aghat sa DOH, kon adunay online nga misa, mas maayo nga didto usa lang motambong aron mamenosan ang contacts, ug alang niadtong pisikal nga motambong sa mga misa sa kaadlawon o sa mga anticipated nga misa sa gabi-i.
Ang DOH wala magpugong kanato nga magpahigayon sa mga salo-salo sa holidays, apan nag-aghat sa tanan sa pagbutang sa kaluwasan sa mga kabanay ug kaugalingon nga maoy labing taas nga konsiderasyon, samtang naglingawlingaw subay sa panahon.
Pagtamud sa minimum public health standards: subay sa lagda sa physical distancing, pagsul-ob ug face mask ug face shield sa tanang higayon samtang naa sa mga lugar pangpubliko, pagpakunhod sa higayon nga makauban ang daghan nga mga tawo aron mubo nalang ang exposure, ug pagseguro nga may igo nga bentilasyon sa lugar nga tapokan.
Sa mubo nga pagkasulti, likayan ang mga lugar nga ug mga kalihukan nga may daku nga risgo sa pagkatakud.
Kini sama sa mga lugar nga walay tataw nga sirkulasyon sa hangin, mga kalihukan ng may nagkantakanta, nagsyagitay, paggunitay ug paghikapay.
Gipahinumdom gihapon sa DOH nga subay sa napabag-o nga Inter Agency Task Force (IATF) Omnibus Guidelines sa pagpatuman sa Community Quarantines, gitugotan ang pagtapoktapok sa misa ubos sa mga nalagda nga kondisyones.
Sa mga lugar nga ilawom sa Modified Enhanced Community Quarantine, dili molapas sa lima ang magkatapok sa kalihukan.
Sa mga lugar nga anaa sa General Community Quarantine, dili molapas sa 30% sa seating capacity ang makasulod sa lugar tapokanan, samtang sa Bohol diin anaa sa Modified General Community Quarantine, dili molapas sa katunga sa seating capacity sa mga simbahan ang gitugot.