Gisulat ni Elvira Bongosia
Gi-awhag sa Department of Interior and Local Government (DILG) ang mga local government units (LGUs) sa pagpalabang ug ordinansa nga magbawal una sa pag-videoke sa mga pampublikong lugar karong holiday season aron makalikay sa Coronavirus disease (COVID-19).
Sa gipahigayong Laging Handa Public Press Briefing sa Presidential Communications Operations Office (PCOO) niadtong Disyembre 10, 2020, miingon si DILG Usec Jonathan Malaya nga ang silot sa mga dili mosunod sa pagbawal sa pag-videoke sa mga pampublikong lugar maoy magdeterminar sa silot nga atubangon sa dili mosunod sa ipalabang nga ordinansa.
Apan giklaro ni Malaya nga ang pag-videoke sa pampublikong lugar lamang ang gibawal.
Matud pa niini nga mahimong mag-videoke sa sulod sa balay basta ang magpamilya lamang ang mokanta ug walay imbitaron nga ubang tawo.
“Sa tingin po namin wala naman pong masama kung kayo ay kumanta sa loob ng inyong bahay. Ngunit kung kayo po ay nasa labas ng inyong bakuran or kahit nasa loob ka ng inyong bakuran ngunit nang-iimbita ka ng mga kapitbahay na pumunta sa inyong bahay, then that becomes a public exercise of karaoke,” matud pa ni Malaya.
(Sa among tan-aw walay dautan kon mokanta sulod sa panimalay. Kon sa gawas sa panimalay maoy gitawag nga public exercise of karaoke.)
Kini tungod kay matud pa base sa pagtuon, daku ang tsansa nga makatakod ug virus kun maghuwamanay ug microphone ug ubos sa general community quarantine (GCQ) rules, hingpit pa gihapong gidili ang dinaghan nga panagtigom.
Sa laing bahin, nihangyo si Malaya nga himuong ‘solemn’ ang pagsaulog sa Pasko karong tuig ug sa sunod nga Pasko na lamang mobawi ug selebrar kon may bakuna na batok sa COVID-19.