Ni Padre Jose “joesum” Sumampong, Jr.
Sagrada Familia (A)
EBANGHELYO (Lukas 2:22 – 40)
Miabot ang panahon nga si Jose ug si Maria magtuman sa seremonyas sa paghinlo sumala sa gisugo sa Balaod ni Moises. Busa gidala nila ang bata ngadto sa Jerusalem aron ihalad nila sa Ginoo. 23Mao kini ang nasulat sa balaod sa Ginoo: “Ang tanang panganayng lalaki kinahanglang ihalad ngadto sa Ginoo.” 24Miadto usab sila aron paghalad sumala sa gisugo sa balaod sa Ginoo: usa ka paris nga tukmo o duha ka kuyabog nga salampati. 25Niining panahona may tawo nga nagpuyo sa Jerusalem nga ginganlag Simeon. Maayo siyang tawo ug mahadlokon sa Dios, ug nagpaabot sa kaluwasan sa Israel. Nag-uban kaniya ang Espiritu Santo,26 ug gipasaligan siya sa Espiritu Santo nga dili siya mamatay hangtod makita niya ang Mesiyas nga gisaad sa Ginoo. 27Minandoan sa Espiritu, misulod si Simeon sa Templo. Sa gidala na si Jesus sa iyang mga ginikanan ngadto sa Templo aron didto ilang himoon kaniya ang gisugo sa Balaod, 28gikugos ni Simeon ang bata ug nagpasalamat siya sa Dios:
29“Karon, Ginoo, kay imo na mang gituman ang imong saad,
Itugot na nga ang imong sulugoon mohalin nga malinawon.
30 Kay sa kaugalingon kong mga mata nakita ko ang imong kaluwasan,
Nga imong giandam atubangan sa tanang katawhan:
31Usa ka kahayag nga magpadayag sa imong dalan ngadto sa mga dili Judio,
Ug maghatag sa himaya ngadto sa imong katawhan, ang Israel.”
32Nahibulong ang amahan ug ang inahan sa bata sa pagkadungog nila sa mga butang nga gisulti ni Simeon bahin kaniya. 34Unya analangin si Simeon kanila ug miingon kang Maria nga inahan sa bata, “Kining bataa gipili sa Dios alang sa kalaglagan ug kaluwasan sa daghang mga tawo sa Israel; mahimo siyang ilhanan gikan sa Dios nga supakon sa daghang mga tawo, 35ug tungod niini madayag ang ilang mga tinagoang hunahuna. Ug ang kaguol, sama sa usa ka hait nga espada, molagbas sa imong kaugalingong kasingkasing.”
36Didtoy usa ka babaye nga propeta nga ginganlag Ana, anak ni Panuel, sa banay ni Aser. Usa siya ka babayeng tigulang na nga minyo sulod sa pito ka tuig, 37ug unya nabalo sulod sa 84 na ka tuig. Wala gayod siya mobiya sa Templo; adlaw ug gabii nagsimba siya sa Dios, nagpuasa ug nag-ampo. 37Niadto gayong taknaa miabot siya ug nagpasalamat sa Dios, ug misulti bahin sa bata ngadto sa tanan nga nagpaabot nga ang Dios motubos sa Jerusalem. 39Tapos matuman ni Jose ug Maria ang tanan nga gisugo sa balaod sa Ginoo, mipauli sila sa Galilea,ngadto sa Nazaret, ang ilang lungsod nga gipuy-an. 40Ug mitubo ang bata ug nahimong kusgan; napuno siya sa kinaadman, ug ang panalangin sa Dios diha kaniya. ANG EBANGHELYO SA GINOO.
Ang Kahulogan Sa Ebanghelyo
(Lk 2:22-40)
Miabot ang panahon… sumala sa gisugo sa Balaod ni Moises. Busa gidala nila ang bata ngadto sa Jerusalem aron ihalad nila sa Ginoo…
Si San Lukas mihatag og dakong pagtagad sa “katumanan” sa balaod niining maong saysay sa lima ka higayon. Si Jesus, bisan pa sa iyang pagka-Dios, misunod gayod sa balaod sa tawo. Wala niya isipa ang iyang kaugalingon nga “labaw”; kondili nga siya “susama lamang sa uban”.
Kining pag-adto ni Maria ug ni Jose, uban sa batang Jesus, ngadto sa templo maoy katapusang bahin sa saysay sa pagka-bata ni Jesus sumala ni San Lukas. Ug gituyo niya nga ang dalan nga pagalaktan ni Jesus, mahimong lahi kay sa gilaktan ni Juan nga Magbubunyag: Samtang ang pagpahibalo sa pagsabak ni Isabel kang Juan gitaho ngadto kang Zacarias sulod sa templo, apan si Juan nga Magbubunyag mipuyo sa dapit nga awaaw. Sa laing bahin si Maria gipahibalo sa iyang pagsabak kang Jesus sulod sa usa ka balay, karon si Jesus ania na sulod sa templo sa Jerusalem.
25… may tawo nga nagpuyo sa Jerusalem nga ginganlag Simeon. Maayo siyang tawo… 36usa ka babaye nga propeta nga ginganlag Ana… adlaw ug gabii nagsimba siya sa Dios, nagpuasa ug nag-ampo.
Katingalahan nga si Jesus wala ilha sa mga opisyal nga tig-atiman sa templo nga mao ang mga pari ug mga magbabalaod, kondili siya giila sa mga yano ug kabos nga mga tawo sama nila ni Simeon ug Ana. Pinaagi kanila si Jesus nakigtagbo na sa mga kabos—mga tawo nga may dakong luna sa pagbati ni Jesus. Dinhi nagsugod na ang panglantaw nga ang “Simbahan kinahanglan nga alang sa mga kabus”.
28gikugos ni Simeon ang bata ug nagpasalamat siya sa Dios: … nakita ko ang imong kaluwasan, 30Nga imong giandam atubangan sa tanang katawhan: 31Usa ka kahayag… sa mga dili Judio, Ug maghatag sa himaya ngadto sa… Israel.”
Laing surprise gikan sa Ginoo. Gahum ug himaya anaa gayod kaniya, apan karon ania siya isip gamayng bata nga dili gani makabarog ug busa gikugos ni Simeon nga gidasig sa Espiritu Santo.
Ang kamatuoran nga ang Dios nga gamhanan misagop sa pagka-walay gahum dili gayod masabot gawas lamang sa mata sa pagtuo. Si Simeon nagabaton og pagtuo! Mao nga iyang nakita kining maong kamatuoran. Matud pa ang Pagtuo maoy usa ka estado sa kakabus: makit-an ta kadtong bisan dili makita.
May kalambigitan kita sa kamatuoran mahitungod sa “lawas” ni Kristo sa bayhon sa “pan” diha sa Yukaristiya. Ang mga titulo nga gipamulong nila ni Simeon ug Ana didto sulod sa templo nga naghulagway sa batang Jesus: “kaluwasan, nga giandam atubangan sa tanang katawhan”, “usa ka kahayag nga magpadayag”, ug “maghatag sa himaya” maoy usa ka pagpadayag sa kamatuoran kon kinsa gayod kini si Jesus.
Kini maoy sukaranan sa Pagtuo!
32Nahibulong ang amahan ug ang inahan sa bata sa pagkadungog nila sa mga butang nga gisulti ni Simeon bahin kaniya.
Sa pagkabati nila ni Maria ug Jose niining maong pamahayag mahitungod sa batang Jesus, sila nahibulong. Bisan pa kon aduna nay gibatonan nga lawom nga pagtuo sila si Maria ug si Jose, sila gihagit gihapon sa ilang pagtuo. Napulog duha ka tuig gikan niining maong panghitabo (nga mao ang pagkakaplag nila sa batang Jesus nga nakig-uban sa mga makinaadmanon didto sulod sa maong templo), si Maria ug si Jose magpabilin nga aduna pay kahibulong sa ilang gihuptan nga pagtuo (Lukas 2:488-50).
24Miadto usab sila aron paghalad sumala sa gisugo sa balaod sa Ginoo: usa ka paris nga tukmo o duha ka kuyabog nga salampati.
Gilarawan ni San Lukas ang rito sa paghalad nga gituman alang kang Jesus sulod sa templo. Ang pulong nga gigamit niini mao nga Griego nga “parastenai” nga nagkahulogan og “paghalad”. Ki-ning pulonga gigamit usab ni San Pablo alang sa pagpasabot kon unsa gayod ang panglantaw sa usa ka Kristohanon. Dili nato kalimtan nga si Lukas mao ang sekretaryo ni San Pablo, ug ang mga sulat ni San Pablo gisulat sa wala pa sulata ang Ebanghelyo sumala ni San Lukas. Mao nga sa makadaghan nga higayon nga si San Pablo, sa iyang mga sulat, mihulagway sa kinabuhi sa Kristyanos nga usa ka paghalad.
Ang paghalad kang Jesus sa templo maoy pasiuna sa Katapusang Panihapon diin si Jesus mihimog paghalad sa iyang kaugalingon alang sa kaluwasan kanatong mga tawo.
Ang kuyabog ug salampati maoy mga halad sa mga kabos! Bisan diay ang mga kabos makahalad.
34… “Kining bataa gipili sa Dios alang sa kalaglagan ug kaluwasan sa daghang mga tawo…
Si Jesus dili gayod mamugos kang bisan kinsa. Kining maong gipamulong didto sulod sa templo maoy naghatag og pagsaksi nga kini si Jesus mahimong dawaton ug mahimo usab nga isalikway.
39… mipauli sila sa Galilea, ngadto sa Nazaret … 40Ug mitubo ang bata ug nahimong kusgan; napuno siya sa kinaadman, ug ang panalangin sa Dios diha kaniya. Ang Jesus mipuyo sa usa ka panimalay. Mao nga ang banay usa ka Gagmayng Simbahanong Katilingban (GSK)!